Huawei компания смартфонларида олинган суратларга бағишлаб ўтказилган танловнинг ролигида профессионал камерада олинган суратлардан фойдалангани маълум бўлди. Бунга 2018 йилда iPhone’да олинган суратлар танловида иккинчи ўринни қўлга киритган Хуапень Чжао эътибор қаратган.
Чжаонинг ёзишича, у Huawei танлови рекламасига бир неча бор дуч келган ва промо-роликдаги суратлардан бири унга таниш туюлган. Блогер ушбу сурат смартфонда эмас, профессионал камерада олинганини шубҳа қилган.
Кейинроқ Чжао ҳақ эканлиги маълум бўлган: сурат Huawei ролигида пайдо бўлишидан олдин 500px сервисига юкланган. Унинг муаллифи Сью Тайи бўлиб, қирғоқдаги кун ботишини Nikon D850 камерасида суратга олган — камера нархи 3 минг доллардан қимматроқ туради.
Чжао муаммога эътибор қаратганидан сўнг, Huawei компанияси Weibo ижтимоий тармоғи орқали кечирим сўраган. Шу билан бирга, компания ушбу сурат Huawei Next-Image сервисидан олинганини, у ерга эса исталган қурилмадан сурат юклаш мумкинлигини таъкидлаган.
2018 йилда Чжао ҳар йил ўтказиладиган iPhone Photography Awards танлови ғолибларидан бирига айланган. У денгиз қирғоғи яқинида сайр қилиб юрган болакайни суратга олган.
Huawei профессионал фотоаппаратларда олинган суратлар борасидаги можарога биринчи бор дуч келаётгани йўқ. 2018 йилда компания профессионал камерада олинган суратларни Nova 3i смартфониники дея илгари сурган бўлса, 2019 йилнинг мартида эса Getty Images сайтидан олинган суратни P30 Pro флагманиники дея атаган.
Изоҳ (0)