Google жониворларнинг уч ўлчамли моделини реал ҳаётда акс эттириш имконини тақдим этди

Google қидирув тизимида айрим уч ўлчамли объектларни топиш ва уларни қўшимча реаллик режимида томоша қилиш имконияти мавжуд, деб ёзади Hi-Tech.Mail.ru.

Бу эса смартфон ёрдамида виртуал объектларни қурилманинг камераси орқали реалликка кўчириш мумкин дегани.

Содда қилиб айтганда, смартфон экранидаги объект худди ёнгинангизда тургандек кўринади. Бунинг учун ўта замонавий смартфон керак бўлмайди. Android 7.0 бошқарувидаги ҳамда Google Play ўрнатилган смартфон бўлса, етарли.

iOS учун операцион тизимнинг 11-версияси ҳамда iPhone SЕ, iPhone 6S, 7-авлод iPod touch ёки 5-авлод iPod каби қурилмалардан бири керак бўлади. Тўлиқ рўйхат билан мазкур ҳаволада танишиш мумкин.

Шундай қилиб, уч ўлчамли жониворни хонангизда кўриш учун ҳеч қандай қўшимча дастур ўрнатиш шарт эмас. Браузернинг ўзи етади. Google Chrome ёки Safari’га кириб, бирон жониворнинг номини ёзамиз.

Масалан, «ўрдак» сўзини киритамиз. Қидирувга бераётганда «ўрдак 3D» эмас, оддий «ўрдак» деб ёзиш кифоя.

Бизга жонивор ҳақидаги асосий маълумотлардан иборат карта керак. Бу смартфонда, одатда, қидирув натижаларининг бошида кўринади.

Уч ўлчамли жониворнинг қўшимча реалликда очиш учун «3D да томоша қилиш» тугмасини босамиз. Жониворнинг модели акс этган янги ойна очилади. Экраннинг устки қисмида «DR» (Қўшимча реаллик) ва «Объект» сўзлари кўринади.

Биринчи ойна жониворни қўшимча реалликда кўрсатади, иккинчиси эса уни экранда кўриш имконини беради. Бундан ташқари, жониворни экраннинг исталган қисмига олиб бориш, уни катталаштириш ёки кичрайтириш имкони ҳам бор. Катта мушукни ёнингизга ўтқазиб қўйишга ҳеч ким халал бермайди.

Қидирув тизимида қуйидаги жониворларнинг уч ўлчамли моделини томоша қилишингиз мумкин:

• енот
• Пасха қуёни
• шер
• йўлбарс
• гепард
• акула
• типратикон
• ўрдак
• пингвин
• бўри
• эчки
• илон
• бургут
• айиқ
• аллигатор
• от
• пони оти
• тошбақа
• мушук
• саккизоёқ
• ит
• мопс
• француз булдоги
• померан шпици
• буғу
• катта панда.

Бундан ташқари, нафақат жониворлар, балки сайёраларни ҳам уч ўлчамда кўриш мумкин. Қидирувда сайёранинг инглиз тилидаги номи ва in depth деб ёзилса бўлди.

Сайёраларни излаш бироз қийин, чунки уларнинг модели NASA’нинг сайтига боғланган. Тизим эса ҳар доим ҳам NASA сайтини биринчи бўлиб кўрсатавермайди.