Бирлашган Араб Амирликлари таркибига кирувчи икки амирлик — Дубай ҳамда Абу-Дабида коронавирусга қарши кураш мақсадида ёпилган савдо марказлари фаолияти қайта йўлга қўйилмоқда, деб хабар берди «РИА Новости».
Al-Arabiya телеканалининг маълум қилишича, Абу-Даби амирлиги Транспорт ва муниципалитетлар департаменти савдо марказларини 30 фоиз ўтказиш қобилияти билан қайта очиш бўйича қарор қабул қилган. Шунингдек, департамент 25 апрель кунидан автобусларни дезинфекция қилиш мақсадида икки кунга режали тўхтатилган жамоат транспортлари ҳаракатини қайта йўлга қўяди.
Emarat Al-Youm газетасининг ёзишича, Дубай амирлиги ҳукумати бозорлар, савдо ва иш марказларини очиш бўйича режани тасдиқлаган. Таъкидланишича, мазкур режа ўз ичига тўртта босқични қамраб олади.
Сўнгги маълумотларга кўра, БАА коронавирус билан касалланганлар сони 8238 кишига етган. Ўтган бир сутка ичида қарийб 500 кишида коронавирус аниқланган бўлиб, 6 киши вафот этган. Пандемия бошланганидан буён мамлакатда 52 бемор вафот этган, 1546 киши даволанишга муваффақ бўлган.
Ўзбекистонда эса коронавирусга чалинган беморлар сони 1716 нафарни ташкил этмоқда — касалланганлар сони 22 апрель соат 23:00 даги ҳолатдан бери ўзгаришсиз қолмоқда.
Изоҳ (0)