АҚШ Давлат департаментининг разведка ва тадқиқотлар бюросида коронавируснинг сунъий келиб чиққани тўғрисидаги маълумотлар йўқ. Бу ҳақда бюро раҳбари, давлат котиби ёрдамчиси Эллен Маккарти видеоконференция пайтида маълум қилган.
«Бу — бизнинг нуқтаи назаримиз. Бутун дунёдаги олимлар коронавируснинг генетик кетма-кетлигини ўрганиб чиқди. Айни пайтда у сунъий усулда яратилганини тасдиқловчи ҳеч қандай далиллар йўқ», — деган у.
Эслатиб ўтамиз, январь ойи охирида АҚШ республикачи-сенатори Том Коттон коронавируснинг сунъий равишда яратилганини тахмин қилган ва Хитойда ягона 4-даражадаги, дунё бўйича энг хавфли патоген миркоорганизмлар устида ишловчи суперлаборатория мавжудлигини билдирганди.
Бундан ташқари, Fox News телеканали ҳам коронавируснинг Уханда лаборатор шароитда яратилганини тахмин қилган. Телеканал коронавируснинг кутилмаганда институт ходимларидан бири тасодифан инфекцияни юқтириб олиши оқибатида тарқалиб кетган бўлиши мумкинлиги ҳақидаги гипотезани илгари сурган.
Нобель мукофоти соҳиби Люк Монтанье ҳам вируснинг Ухандаги лабораторияда ишлаб чиқилгани ҳақида фикр билдирган.
Хитой Ташқи ишлар вазирлиги вакили Чжао Лицзян эса ушбу тахминларга жавобан Жаҳон соғлиқни сақлаш ташкилоти коронавируснинг сунъий синтез оқибатида пайдо бўлганлигини тасдиқламаганини қайд этган. Ухань вирусология институти раҳбари Юань Чжимин бугунги кун олимлари янги турдаги коронавирусдек вирусни сунъий тарзда яратиш учун етарли билимга эга эмас, деб айтган.
Жаҳон соғлиқни сақлаш ташкилоти эса коронавирус келиб чиқиши ҳайвонларга бориб тақалади, деб ҳисобламоқда.
Изоҳ (0)