Москвадаги 3-сонли уруш фахрийлари госпиталида ишлаган уролог, 56 ёшли Максим Старинский коронавирус инфекциясининг асоратлари туфайли вафот этди. Бу ҳақда The Moscow Times нашри врач билан бирга ишлаган икки нафар ҳамширанинг маълумотига асосланиб хабар тарқатган.
Госпиталда апрель бошида коронавирусга қарши стационар даволаш бўлими фаолият бошлаганди. Ҳамширалар касалхонанинг COVID-19 беморларини қабул қилишга тайёр бўлмаганини таъкидлаган. Уларнинг сўзларига кўра, ўтган ҳафтада госпиталнинг 64 нафар ходимида коронавирус инфекцияси аниқланган. Касалланганларнинг икки нафари интенсив терапия бўлими палаталарида даволанмоқда.
20 апрель куни 3-сонли уруш фахрийлари госпиталида коронавирусга чалинган тиббиёт ходимларининг борлиги ҳақида соғлиқни сақлаш ходимларининг «Действие» ҳудудлараро касаба қўмитаси раиси ўринбосари Андрей Коновал маълум қилганди. У ҳам шифокорлардан бири вафот этгани ҳақида ёзган, бироқ ўлим сабаби ва врачнинг исм-фамилиясини ошкор қилмаганди.
The Moscow Times хабарига кўра, Максим Старинскийнинг вафоти — COVID-19 билан касалланган беморларни даволаётган шифокорлар орасида кузатилган биринчи ўлим ҳолати. 16 апрелда Уляновск вилояти рентгенологи Владимир Фиошин ҳам коронавирус инфекциясидан вафот этгани ҳақида хабарлар тарқалган.
Мавзуга доир: Коми, Ёқутистон ва Мурманск Россиядаги коронавируснинг жиддий ўчоқларига айлангани маълум қилинди
Аввалроқ Санкт-Петербургда коронавирусга чалинган тиббиёт ходимларига 4000 доллардан берилиши, Москвада ЎРВИ билан хасталанган барча беморлар карантинга олинаётгани, Россиядаги касалхоналардан бирида 9 нафар тиббиёт ходими коронавирусни юқтириб олгани ҳақида хабарлар берилган.
Изоҳ (0)