Жонс Ҳопкинс университети маълумотларига кўра, коронавирус оқибатида вафот этганлар сони дунё бўйича 171 минг кишини ташкил қилмоқда, инфекция билан касалланганлар сони 2,5 миллион кишидан ошди. Коронавирус пандемияси бўйича 21 апрелнинг асосий хабарлари.
Жаҳондаги вазият
Жонс Ҳопкинс университетининг Тошкент вақти билан соат 20:10 даги маълумотларига кўра:- дунё бўйича инфекция билан касалланганлар — 2 501 156 киши;
- касалликдан тузалганлар — 659 732 киши;
- инфекция оқибатида вафот этганлар — 171 810 киши.
Хитой Соғлиқни сақлаш миллий комиссияси маълумотларига кўра, мамлакатда ўтган бир сутка ичида коронавирус билан касалланиш бўйича 11 та ҳолат аниқланди, 22 киши тузалди, вафот этганлар қайд этилмади. Хитойда умумий ҳисобда 83 849 киши коронавирусга чалингани тасдиқланган, 4 636 киши вафот этган.
Жанубий Кореяда бир сутка ичида коронавирус билан касалланиш бўйича 9 та ҳолат аниқланиб, касалланганларнинг умумий сони 10 683 кишига етди. Касалланганларнинг 99 нафари тузалган, вафот этганлар сони 237 кишига етди. Аввалроқ вафот этганлар сони 236 кишини ташкил қилаётгани ҳақида хабар берилганди.
Афғонистонда коронавирусга чалинганлар сони 1005 кишига етди. Мамлакатда коронавирус сабабли 31 киши вафот этган, касалликдан тузалган сони ҳам 31 кишини ташкил этмоқда.
Африкада коронавирусга чалинганлар сони 22 500 кишидан ошди. Африканинг учта давлати — Лесото, Ғарбий Саҳро ва Комор оролларида ҳалигача коронавирус қайд этилмаган.
Қозоғистонда коронавирусга чалинганлар сони 1967 кишига етди, 19 киши вирус қурбонига айланган. Шунингдек, 447 бемор даволанишга муваффақ бўлган.
Қирғизистонда коронавирус билан касалланганларнинг жами сони 590 кишига етди. Айни вақтда 367 киши стационарда даволанмоқда, уларнинг 5 нафари жонлантириш бўлимида. Пандемия бошланганидан буён 7 киши вафот этган, 216 киши вирусдан фориғ бўлган.
Ўзбекистондаги вазият
Ўзбекистонда 21 апрель соат 10:00 ҳолатига кўра, коронавирус инфекциясини юқтириб олиш билан боғлиқ 30 ҳолат тасдиқланиб, касалланганлар сони 1657 кишига етди.20 апрель куни Ўзбекистонда коронавирус инфекциясини юқтириб олиш билан боғлиқ 62 та янги ҳолат тасдиқланганди. Таққослаш учун, 13 апрель куни 133 та, 14 апрель куни 167 та, 15 апрель куни 137 та, 16 апрель куни 47 та, 17 апрель куни 56 та, 18 апрель 85 та, 19 апрель эса 75 та янги ҳолат тасдиқланган.
Ўзбекистонда коронавирус билан хасталанган яна бир эркак бемор вафот этди. Бу Ўзбекистонда коронавирусга чалинган беморнинг вафот этиши билан боғлиқ олтинчи ҳолатдир. Бунгача 27 март куни Наманган вилоятида Умрадан қайтган қизидан коронавирус юқтириб олган 72 ёшли онахон миокард инфарктидан (унинг жанозасида қариндошларидан ҳеч ким иштирок этмаган), 28 март куни Тошкент шаҳрида ўзини уйда даволашга уринган 39 ёшли (эркак) шифокор коронавирус инфекциясидан, 7 апрель куни коронавирусга чалинган 40 ёшли эркак юрак ва ўпка етишмовчилигидан, 11 апрель куни эса хориж сафаридан коронавирусга чалиниб қайтган фарғоналик 59 ёшли аёл ўткир респиратор дистресс синдром, ўткир нафас етишмовчилиги ҳамда ўпка-юрак етишмовчилиги оқибатида, 18 апрель куни Тошкент шаҳрида 77 ёшли аёл коронавирус инфекцияси асоратлари — икки томонлама бронхопневмониянинг оғир кечиши, ўткир нафас етишмовчилиги ва ўпка шишидан вафот этгани маълум қилинган эди.
Ўзбекистонда 21 апрель куни 96 киши коронавирусдан тузалди. Мамлакатда тузалганлар сони 357 нафарга етди. Улар орасида энг ёши каттаси 71 ёшда бўлса, энг кичиги 2019 йилда туғилган.
Бухорода коронавирусга чалинганлар 388 нафарга етди. Беморлар орасида юк автомобили ҳайдовчилари ҳам бор. 20 апрель куни касалликка чалингани аниқланган икки нафар бемор Бухоро шаҳрида истиқомат қилувчи юк машинаси ҳайдовчиси бўлган.
Шу кунга қадар Ўзбекистонда 150 мингга яқин киши коронавирус бўйича тестдан ўтказилган. Олинган тестларнинг сони келгусида максимал оширилиши ҳисобигагина карантин шартларини юмшатиш мумкин.
Ўзбекистон бўйича асосий маълумотлар
Хориждаги ўзбекистонликларни олиб келувчи янги чартер рейсларни ташкил қилиш бўйича алоҳида қарор қабул қилинади. Чартер рейсларнинг санаси ва йўналишлари тўғрисида расмий манбалар орқали қўшимча равишда маълумот берилади.
Шунингдек, Президент карантин даврида қурилиш ҳажми камайишига йўл қўймаслик зарурлигини таъкидлади. «Тармоқ раҳбарлари ишларни тўғри ташкил этсалар, иқтисодий инқироздан имкон қадар кам йўқотишлар билан чиқиб кетамиз», — деган Президент.
Тошкент шаҳридаги хусусий меҳмонхоналарда ташкил қилинган карантин ҳудудларида кимлар сақланиши айтилди.
Тошкент шаҳри ичкарисидаги хусусий меҳмонхоналарда ташкил қилинган карантин ҳудуди вирус юқтирганликда гумондорлар эмас, балки ишлашда давом этаётган ташкилот ва идора ходимлари учун. Улар учун алоҳида транспорт йўлга қўйилган. Меҳмонхона атрофи махсус қўриқланади ва бу жараён масофани сақланганда қўшнилар учун хавф туғдирмайди.Фарғонада коронавирусга чалинган беморларни даволаган 73 нафар тиббиёт ходими ўрин алмашди. Шифохонани тарк этган тиббиёт ходимлари Фарғона туманидаги сиҳатгоҳда 14 кун давомида изоляция қилинади.Ҳабибулла Оқилов, Коронавирусга қарши кураш штаби аъзоси
Андижондаги 28 та бозорда дезинфекция қилувчи туннель ва санитария постлари ўрнатилди. Бозорларда дезинфекция туннелларини ўрнатиш андижонлик ёшлардан чиққан таклиф бўлиб, туннелларни ишлаб чиқаришга Ўзбекистон Ёшлар Иттифоқи ҳомийлик қилмоқда.
Самарқандда эҳтиёжманд оилалар учун мўлжалланган арзон уннинг қопига 15 минг сўм қўшиб сотган маҳалла раиси қамалди. Суд мажлисида МФЙ раиси ўз айбига иқрор бўлиб, уйига ун сўраб келганларга 145 минг сўмлик унни 160 минг сўмдан сотганини тан олган.
Ўзбекистон мактабларида ўқув йили онлайн тарзда якунланади. Ўқитувчилар ўз иш фаолиятларини масофавий тарзда давом эттиради.
Келгусида хорижга чиқишда коронавирусга чалинмаганлик ҳақида маълумотнома беришнинг имкони йўқлиги айтилди. «Ўтказилган коронавирус таҳлили жавоби қайси муддатгача амал қилиши катта сўроқ остида», — дея жавоб берди Коронавирусга қарши кураш штаби аъзоси. Шунингдек, коронавирусга чалинган беморлар қанча муддатда тузалиши маълум қилинди. Тузалгандан сўнг беморлар билан яна 14 кун давомида реабилитация ишлари олиб борилади.
Хусусий тиббиёт ташкилотлари ҳозирча коронавирус таҳлилини ўтказиш жараёнига жалб этилмаслиги маълум қилинди. Соғлиқни сақлаш вазирлиги ва Санитария-эпидемиологик осойишталик агентлигининг лаборатория таҳлилларини ўтказиш имкониятлари етарли эканлиги аниқланган.
ИИВ карантин вақтида стикерсиз автомашинани жарима майдонига олиб кетилишининг қонунийлиги ҳақида маълумот берди. Автотранспорт жарима майдонига олиб кетилмаса, мазкур шахслар карантин билан боғлиқ чекловларга риоя қилмасликни давом эттириши мумкин.
Шунинигдек, Ички ишлар вазирлиги Ўзбекистонда карантин қоидалари энг кўп бузилаётган вилоятлар рўйхатини эълон қилди. Бугунги кунга қадар карантин қоидаларига амал қилмаслик билан боғлиқ жами 86 411 та ҳолат аниқланган.
Карантинда маст ҳолда нотаниш аёлга шилқимлик қилган фарғоналик фуқаро қамоққа олинди. Қоидабузарлик бўйича фуқарога нисбатан маъмурий баённома расмийлаштрилиб, судга оширилган.
Жаҳонда нима гап?
Саудия Арабистонидаги Ислом оламининг асосий зиёратгоҳлари Рамазон ойида ҳам ёпиқ қолади. Мусулмонлар Рамазон ойида ушбу масжидларда жамоатчилик ва таровеҳ намозларини ўқий олмайди.Коми, Ёқутистон ва Мурманск Россиядаги коронавируснинг жиддий ўчоқларига айлангани маълум қилинди. Путиннинг қайд этишича, касалликнинг энг юқори чўққиси ҳали олдинда турибди.
Санкт-Петербургда коронавирусга чалинган тиббиёт ходимларига 4000 доллардан берилади. Агар коронавирус билан касалланиш оқибатида шифокорда ногиронлик юзага келса, унга 6600 доллар миқдорида товон пули тўланади.
Путин АҚШ ва Италияга нима учун инсонпарварлик ёрдами жўнатганини тушунтирди. У инфекцияга қарши кураш олиб бораётган давлатларга ёрдам кўрсатилиши бир томонлама ҳаракат йўли эмаслигини таъкидлади. Шунингдек, Россия президенти коронавирусга қарши вакцинанинг давлат рўйхатидан ўтказилишини тезлаштиришга буйруқ берди. Айни пайтда вакцина клиник текширувларга қадар ҳайвонларда синовдан ўтказилаётгани маълум қилинган.
Россиялик миллиардер COVID-19 билан боғлиқ вазиятни «Чернобиль фалокатининг биологик варианти» деб атади. «Вирусдан талафот кўрган миллионлаб одамлар битта саволга — бунинг қандай қилиб рўй берганига, вируснинг қаердан пайдо бўлиб қолганига жавоб топишни истайди», — дейди Дерипаска.
Қозоғистонда карантин чекловларини енгиллаштириш бошланди. 20 апрелдан бошлаб Нур-Султон ва Олмаотадаги саноат корхоналари, қурилиш соҳаси ва айрим хизмат кўрсатиш тармоқлари ўз фаолиятини қайта йўлга қўйган.
Украина соғлиқни сақлаш вазири ўринбосари Ирина Микичак мамлакатда коронавирусга чалинган беморнинг касалхонада даволаниши нархи кунига 11 доллардан 370 долларгача бориши мумкинлигини маълум қилди.
Эрон Трампнинг коронавирусни даволаш борасидаги маслаҳатларига муҳтож эмаслигини билдирди. Аввалроқ Трамп Эронга коронавирусга қарши кураш йўлида Америкадан ёрдам сўрашни маслаҳат бериб, сунъий нафас олдириш аппаратларини етказиб беришга тайёр эканлигини билдирганди.
Трамп иммигрантларнинг АҚШга киришини вақтинча тақиқловчи қарорни имзолайди. Бу коронавирус пандемияси даврида америкаликларнинг иш жойларини ҳимоя қилиш мақсадида амалга оширилади.
ЖССТ вакили коронавирус билан боғлиқ чекловларни вақтли олиб ташламасликка чақирди. «Одамлар ва жамият янги ҳаёт тарзига тайёр бўлиши керак», — деди ЖССТ вакили.АҚШда коронавирусни даволаш бўйича 70 дан ортиқ усуллар синовдан ўтказилмоқда. Шунингдек, мамлакатда ўнлаб терапевтик усуллар ва даволаш йўллари тадқиқ қилинмоқда.
Ўқишни қатъий тавсия этамиз: Янги COVID-19 Ухань лабораторияси маҳсулими? Люк Монтаньенинг коронавирус Ухань лабораториясида яратилган дейиши кескин баҳсларни келтириб чиқарди. Унга қай даражада ишониш мумкин? Бу саволга ўзбекистонлик ёш биолог Бахтиёр Шералиев жавоб беради.
Ҳар куни кечқурун фақат битта хабар жўнатамиз. «Дарё» оқшоми — кун давомида рўй берган барча воқеа-ҳодисалар дайжести Telegram-канали: @daryooqshomi
Изоҳ (0)