Eron Trampning koronavirusni davolash borasidagi maslahatlariga muhtoj emasligini bildirdi
AQSh prezidenti Donald Tramp Eronga koronavirusga qarshi kurash yo‘lida Amerikadan yordam so‘rashni maslahat berib, sun’iy nafas oldirish apparatlarini yetkazib berishga tayyor ekanligini bildirdi. Eron Tashqi ishlar vazirligi shu ondayoq javob qaytarib, Amerikaning maslahatlariga muhtoj emasliklarini ma’lum qildi.
Oq uyda o‘tkazilgan matbuot anjumani vaqtida Donald Tramp o‘pkani sun’iy nafas oldirish apparatlarini yetkazib berish bo‘yicha yettita davlat yetakchilari, xususan, Meksika bilan muhokama qilgani haqida so‘zladi. Tramp Eron agarda yordam so‘rasa, yordam berishga tayyorligini qo‘shimcha qilgan.
“Agarda bu borada Eronga yordam kerak bo‘lsa, men biror nima qilishga tayyorman, ular buni xohlasa, so‘rasa, albatta”, — deydi Tramp.
Amerika yetakchisining so‘zlariga ko‘ra, Eron koronavirusdan jiddiy jabr ko‘rgan va qurbonlar borasida rasman e’lon qilingan raqamlar “tabiiyki… to‘g‘ri bo‘lmagan”.
Trampning ushbu so‘zlariga Eron tashqi ishlar vaziri Muhammad Javod Zarif Twitter orqali javob qaytardi: “Bir necha oydan keyin Eron o‘pkani sun’iy nafas oldirish apparatlarini eksport qila boshlaydi”. “Sizdan talab qilinadigan yagona narsa, boshqa xalqlarning ishlariga aralashmaslik, ayniqsa, mening. Va menga ishonishingiz mumkin, bizga birorta amerikalik siyosatchining maslahati kerak emas”, — deb yozadi Zarif.
Mavzuga doir:
