Қашқадарё Ички ишлар бошқармаси ЙПХ инспекторлари ўзбошимчалигига жавоб бермади. Оқибатда бошқарма бошлиғи топшириғига зид равишда жарима майдонига қамалган машиналар ҳамон ўша ерда қолмоқда.
Ушбу ҳолатни изоҳлаган вилоят ИИБ аборот хизмати раҳбари Ирода Расулова «жавоб берамиз»дан нарига ўтмади.
Эслатиб ўтамиз, жорий йил 14—15 апрель кунлари Қарши шаҳрида ЙПХ инспекторлари Қарши туманида кластерлик фаолияти билан шуғулланувчи корхонага тегишли барча автомобилларни ёппасига жарима майдонига олиб кетганди. Бунинг сабабини сўраган ҳайдовчиларга эса «Sulton tex group бугундан тўхтатилади, буйруқ ҳам чиқиб қолади», — деганди.
«Кўчага иш билан чиққан автомобилларимизни ёппасига жарима майдонига олиб кетишгани учун қишлоқ хўжалиги юмушларини бажаролмаяпмиз. Шу кунгача 3 та машинамизни сабабсиз жарима майдонига қамаб қўйишди», — дейди кластер раҳбари Нурбек Эргашев.
Таъкидлаш лозим, мазкур кластер тақдири ноаниқ бўлса-да, кластер туманда ўзига тегишли 1,5 минг гектар майдонда экин-текин ишларини бажариши лозим. Экин экиш ишлари кечикса, нафақат фермер, вилоят қишлоқ хўжалиги ҳам зарар кўриши кундек равшан.
Қайд этиш лозим, вилоят ИИБ бошлиғи Шуҳрат Сотволдиев 2020 йилнинг 11 апрель куни Sulton tex group хусусий корхонасининг барча енгил ва юк автомобилларига қишлоқ хўжалиги ишлари ва экспорт билан шуғулланаётгани учун Қарши шаҳрига кириш-чиқишга рухсат берганди.
Изоҳ (0)