Ўзбекистонда 20 апрель соат 10:00 ҳолатига кўра коронавирусга чалиниш билан боғлиқ ҳолатлар сони ўзгаришсиз қолди ва 1565 тани ташкил этмоқда. Бу ҳақда давлат бош санитария инспектори Нурмат Отабековнинг «Ўзбекистон 24» телеканали орқали берган баёноти далолат бермоқда.
Унинг маълум қилишича, ҳозирда Тошкентдаги учта клиникада 371 киши даволанмоқда, уларнинг 78 нафарида пневмония клиник белгилари кузатилмоқда.
Вирусология илмий-текшириш институти клиникасида 94 бемор даволанмоқда, уларнинг 24 нафарида пневмония кузатилмоқда, тўрт беморнинг аҳволи оғир, бир нафарининг аҳволи ўта оғир.
Эпидемиология, микробиология ва юқумли касалликлар илмий-текшириш институти клиникасида 83 киши даволанмоқда, улардан икки нафарининг аҳволи оғир.
Тошкент тиббиёт академиясининг кўп тармоқли клиникасида 194 киши даволанмоқда, 53 кишида пневмония кузатилмоқда, беш беморнинг аҳволи оғир, деб баҳоланмоқда.
Ўтган бир сутка давомида коронавирусга 11,8 мингта тест ўтказилган. Бундан кўзланган мақсад, Нурмат Отабековнинг айтишича, касалликни эрта босқичда аниқлаш ва инфекция ўчоқларини бартараф этиш.
Ўзбекистонда 15 мартдан бери 225 киши коронавирусдан соғайди, беш киши эса инфекция асоратлари оқибатида вафот этди. Бундан ташқари, хорижда 73 ўзбекистонлик коронавирусга чалинган, уларнинг тўрт нафари вафот этган.
Эслатиб ўтамиз, Ўзбекистонда карантин тартиби 10 майга қадар узайтирилди, Республика махсус комиссияси карантин даври учун янги тартибларни эълон қилди.
Изоҳ (0)