Ўзбекистонда карантин қоидалари ва санитария чекловларига риоя қилиш юзасидан тушунтириш ишлари олиб борилишига қарамасдан, ҳамон қоидабузарлик ҳолатлари кузатилмоқда, деб ёзмоқда ИИВ матбуот хизмати.
Хусусан, 17 апрель, жума куни, Сирдарё вилояти Янгиер шаҳридаги Мамадалиев кўчасида яшовчи 1992 йилда туғилган аёл М.К. карантин қоидаларини бузиб, яшаш хонадонига меҳмон чақиргани аниқланган. Спиртли ичимлик истеъмол қилиб, қўшнилари тинчлигини бузиб, бақир-чақир қилиб турган вақтида унинг тинчланишини сўраган ИИБ ходимларининг қонуний талабларини бажармаган.
Ҳолат юзасидан 18 апрель куни Маъмурий ишлар бўйича Ховос тумани суди томонидан Маъмурий жавобгарлик тўғрисидаги кодекснинг 54-моддаси (Эпидемияларга қарши кураш қоидаларини бузиш), 183-моддаси (Такроран жамоат жойларида алкоголь маҳсулотини истеъмол қилиш) ва 194-моддалари (Ички ишлар органлари ходимининг қонуний талабларини бажармаслик)га асосан 1 миллион 115 минг сўм жарима жазоси тайинланган.
18 апрель куни эса Хива шаҳар А.Болтаев кўчасида яшовчи 1980 йилда туғилган Қ.Б. соат 16:00 да уйига 2 эркак ва 2 аёлни чақириб, улар билан маишат қилиб, спиртли ичимлик истеъмол қилиб ўтирганлиги аниқланган. Шу куни Хива шаҳар «Дўстлик» маҳалласида яшовчи 1999 йилда туғилган А.Э. ҳам соат 02:00 да уйига 2 эркак ва 2 аёлни чақириб, улар билан маишат қилиб, спиртли ичимлик истеъмол қилиб ўтирганлиги аниқланган.
Ҳар икки ҳолат юзасидан Маъмурий жавобгарлик тўғрисидаги кодекснинг 54-моддаси асосида ҳужжатлар расмийлаштирилган.
Вазирлик матбуот хизматининг таъкидлашича, карантин тадбирлари эълон қилинган вақтдан бугунги кунга қадар республика бўйича карантин қоидаларига амал қилмаслик билан боғлиқ жами 79 851 та ҳолат аниқланган.
Эслатиб ўтамиз, Республика махсус комиссияси томонидан 20 апрелга қадар жорий этилган чекловчи тадбирлар (карантин) ҳамда коронавирус инфекцияси тарқалишига қарши кучайтирилган тартиб 10 майга қадар узайтирилди.
Изоҳ (0)