Адлия вазирлиги Республика махсус комиссиясининг қарори билан карантиннинг 2020 йил 10 майигача узайтирилганидан кейин амалга ошириладиган қўшимча чора-тадбирлар ҳақида маълумот берди.
Республика махсус комиссияси томонидан коронавирус инфекцияси кенг тарқалишининг олдини олиш мақсадида ҳозирга қадар жорий этилган барча чекловларнинг 2020 йилнинг 10 майига қадар узайтирилганлигидан келиб чиқиб, қуйидагилар маълум қилинди:
- Хорижий фуқароларга берилган виза муддатлари 2020 йилнинг 1 июнгача автоматик тарзда узайтирилди.
- Ноозиқ-овқат буюмлар (кийим-кечак, хўжалик моллари, кўчатлар, уруғлар) савдосини сайёр савдо нуқталари орқали санитария-гигиена талабларига тўлиқ риоя қилинган ҳолда ташкил этишга рухсат берилади. Бунда ижтимоий масофа (2 метр) сақланиши ҳамда бошқа санитария-гигиена қоидаларига риоя этилиши мажбурийдир.
- Карантин даврида муддати тугайдиган барча рухсат бериш хусусиятига эга бўлган ҳужжатлар (лицензия ва рухсатномалар) ҳамда шахсни тасдиқловчи ҳужжатларнинг (фуқаролик паспорти, Ўзбекистонда яшаш рухсатномаси), автотранспорт воситалари учун талаб қилинадиган ҳужжатлар (суғурта полиси, транспортни бошқариш учун ишончнома, транспорт воситасини (қайта) рўйхатдан ўтказганликни ҳамда техник кўрикдан ўтганлигини тасдиқловчи ҳужжатлар) амал қилиш муддати 2020 йил 1 июлга қадар узайтирилади. Уларнинг муддати ўтганлиги муносабати билан жавобгарлик ва бошқа чоралар қўлланилмайди.
- Карантин даврида пенсия пулларини фақатгина банк пластик карталарига ўтказиш тартиби белгиланганлигини инобатга олган ҳолда пенсионерларнинг пластик карталаридаги операциялар учун комиссион тўловларни ундирмаслик тартиби жорий этилади.
- Электрон рақамли имзо калитини масофадан туриб олиш механизми жорий этилади.
- Етказиб бериш хизматини кўрсатувчи лицензиясига эга бўлган, йўналишсиз таксилар ҳайдовчилари махсус комбинезон (шахсий ҳимоя кийими), тиббий қўлқоп ва ниқобларда фаолият олиб бориши лозим.
- Йўловчи ташиш фаолияти билан боғлиқ барча лицензиялар бўйича ариза қабул қилиш ва лицензияларни кўриб чиқиш ва бериш 2020 йил 10 майгача қадар вақтинча тўхтатилади.
- Нодавлат тиббиёт ташкилотларига барча талабларга риоя қилган ҳолда ҳудуддий санитария-эпидемиологик осойишталиги марказлари раҳбарлари томонидан имзоланадиган шартнома асосида 2020 йил 1 сентябрга қадар коронавирус инфекциясини лаборатор текшириш бўйича пуллик тиббий хизмат кўрсатишларига рухсат берилади.
Хусусан, деҳқон бозорларида, шу жумладан, бозор ҳудудидан ташқарида жойлашган йирик озиқ-овқат дўконларида савдо ижтимоий масофа (2 метр) сақлаган ҳолда «зигзаг» тартиби (қувурлар, бантлар ва бошқа шу каби тўсиқлар орқали) ташкил этилади.
Ҳар бир бозорга киришда «дезинфекция туннели» ва «санитария пост»лари, дезинфекция гуруҳлари ташкил этилиб, улар бозор ҳудудида карантин чоралари талабларига риоя этилишини таъминлаб боради.
Юқорида баён этилган тартиблар бир томондан коронавирус инфекцияси кенг тарқалишининг олдини олишга, бошқа томондан эса карантин даврида фуқароларнинг соғлиғи ҳамда ижтимоий муҳофазасини қатъий таъминлашга қаратилган, дейилади ахборотда.
Мавзуга доир:
Изоҳ (0)