ИИВ вазири матбуот котиби ички постлардаги қуролланган ҳарбийлар ва фуқароларнинг паспорт олиб юришига изоҳ берди

АОКА ҳузурида ташкил этилган штабдаги Ички ишлар вазири матбуот котиби Шоҳрух Ғиёсов ҳудудларда ташкил этилган ички постларда қуролланган ҳарбийлар туриши ҳамда фуқароларнинг паспорт олиб юриши масаласига изоҳ берди.

Жумладан, фуқаролар томонидан постларда Миллий гвардия ва Ички ишлар ходимларининг ўзлари етарли эканлиги, карантин вақтида қуролланган ҳарбийлар туриши одамлар орасида ваҳима чиқариши мумкинлиги хусусида йўлланган саволга қуйидагича жавоб берилган: «Ушбу зарурат, республикамиз ҳудудида коронавирус пандемияси тарқалиши билан боғлиқ вазиятда, аввало, аҳолининг санитария-эпидемиологик осойишталигини таъминлаш ва мазкур касалликнинг мамлакатимиз бўйлаб кенг тарқалиб кетишини олдини олиш ҳамда назоратдан чиқмасликни таъминлаш мақсадида белгиланган чора-тадбирлардан бири».

Шунингдек, фуқаролар кўчага чиққанда паспорт олиб юриши масаласига ҳам тўхталиб ўтилди.

«Бунда шахсга аниқлик киритиш керак бўлади. Агар фуқаронинг ёнида шахсини тасдиқловчи ҳужжат бўлмаса, Ички ишлар органига олиб бориб, шахсни аниқлаштиришга зарурат туғилиши мумкин. Зарурат билан кўчага чиққанда паспортингизни олиб юришингиз керак», — дея жавоб берди ИИВ матбуот котиби.

Ишга бориш учун йўлга чиққан фуқаролар, қўшимча равишда, ишхона гувоҳномаси ва ҳақиқатан ҳам ишга жалб этилганлиги ҳақидаги раҳбар тасдиқлаган маълумотномани олиб юриши лозимлиги такрорлаб ўтилди.

Паспорт ёки бошқа ҳужжатни олиб юриш зарурати махсус комиссия қарорида кўрсатилмаганлиги карантин вақтида юзага келиши мумкин бўлган барча ҳатти-ҳаракатларини регламентлаштиришнинг имконияти йўқлиги билан изоҳланди. Шунинг учун махсус брифинглар ташкил этилиб, жавоб берилаётгани таъкидланди.

«Олиб юрилиши зарур бўлган ҳужжатлар, тавсия сифатида, яъни, фуқароларнинг вақтини тежаш, асаббузарликларга йўл қўймаслик ҳамда кўчада бемақсад юрилмаётганлигини исботлаб бериш мақсадида айтилмоқда. Бунда фақат сизнинг фойдангиз ва бизга енгиллик кўзланмоқда. Бизнинг кўрсатмаларимиздан камчилик қидирмасдан, баҳслашмасдан, карантин вақтидаги зарурат сифатида қарашингизни сўраймиз», — дейди Шоҳрух Ғиёсов.

Эслатиб ўтамиз, 6 апрелдан бошлаб Республика махсус комиссияси томонидан қўшимча чора-тадбирлар белгиланди. Жумладан, «ўзини яккалаш» ҳаёт тарзи Нукус ва Тошкент шаҳарлари ҳамда вилоятлар марказларида мажбурий равишда жорий этилди. Шунингдек, Тошкент ва Нукус шаҳарлари ҳамда вилоят марказларида истисно ҳолатлардан ташқари мототранспорт (скутер) ҳамда велосипедда ҳаракатланиш карантин даврида вақтинча чекланди.