АОКА ҳузурида ташкил этилган штабда ўтказилган брифингда Вазирлар Маҳкамаси ҳузуридаги Таълим сифатини назорат қилиш давлат инспекцияси матбуот котиби Феруза Мадраҳимова фуқаролар томонидан келаётган саволларга жавоб қайтарди.
«Дарё» мухбирининг хабар беришича, саволларнинг аксарияти таълим масканларида ўтказиладиган аттестация ва аккредитация жараёнлари, хорижий дипломларни нострификация қилиш масалалари билан боғлиқ.
Мавзуга доир: Ўзбекистонда карантин сабаб абитуриентлар ОТМларга имтиҳонсиз қабул қилиниши ҳақидаги хабарлар рад этилди
Ҳозирда Таълим инспекциясида мактаблар аттестацияси ва давлат аккредитацияси жараёни электрон платформа орқали онлайн мониторинг қилинмоқда. Ушбу платформа қисқа вақт ичида мактаблар тўғрисида таҳлилий маълумотларни тўплашда қулайлик яратяпти. Шунингдек, аттестация жараёнидаги бюракратик тўсиқларни олиб ташлаш, коррупцияни олдини олиш, мутахассисларнинг вақти ва йўл харажатларини тежаш ҳамда тезкор ахборот алмашиш имконини бермоқда.Бундан ташқари, аттестация ва давлат аккредитация жараёнларида мактабнинг ўзига борган ҳолда амалга ошириладиган жараёнлар мавжуд. Бироқ ҳозирги карантин тартиби сабаб буни иложи йўқ. Ушбу ҳолатда республика бўйича 731 та умумий ўрта таълим мактабларининг давлат аккредитацияси тўғрисидаги гувоҳномасини амал қилиш муддати тугаб, битирувчиларга давлат намунасидаги аттестат бериш ваколати йўқолиши кутилмоқда.
Юқоридагиларни инобатга олиб, умумий ўрта таълим мактабларининг ташқи аттестациядан ўтказиш графигига мувофиқ, 2020 йил 16 мартдан кейин аттестацияга жалб қилинадиган мактабларнинг давлат аккредитацияси тўғрисидаги гувоҳномаларининг амал қилиш муддатини карантин тугагунича узайтиришга рухсат бериш бўйича ишлар олиб бориляпти.
Феруза Мадраҳимова, Вазирлар Маҳкамаси ҳузуридаги Таълим сифатини назорат қилиш давлат инспекцияси матбуот котиби
Изоҳ (0)