Соғлиқни сақлаш вазирлиги Тошкент тиббиёт академияси кўп тармоқли клиникасидан илк бор коронавирус инфекциясига чалинган 11 бемор буткул соғайганини хабар қилди.
Хабарга кўра, улар Соғлиқни сақлаш вазирлиги масъуллари иштирокида Республика ихтисослаштирилган терапия ва тиббий реабилитация илмий-амалий тиббиёт марказига кузатилган.
Соғайганларнинг барчаси чартер рейс орқали Туркиядан Тошкентга келган бўлиб, 7 нафари «Ботаника» санаторийсига, қолган 4 нафари эса Ўртасарой карантин марказига жойлаштирилганди.
Уларда коронавирус инфекцияси борлиги тасдиқлангач, беморлар Тошкент тиббиёт академияси кўп тармоқли клиникасига жойлаштирилган. Тузалганларнинг 7 нафари эркак, 4 нафари аёллар. 4 нафари — Тошкент шаҳрида, 4 нафари — Тошкент вилоятида, 2 нафари — Фарғона ва 1 нафари — Андижон вилоятида истиқомат қилувчи фуқаролар. Соғайганларнинг энг ёши каттаси 51 да, энг кичиги эса 23 ёшда.
19 апрель 17:30 ҳолатига кўра, Ўзбекистонда коронавирус инфекциясидан тузалганларнинг умумий сони 225 нафарни ташкил қилмоқда.
19 апрель соат 16:06 ҳолатига кўра, Ўзбекистон бўйича коронавирусдан буткул соғайганлар сони 214 кишига етгани маълум қилинган.
18 апрель куни Ўзбекистон бўйлаб коронавирус инфекциясидан бутунлай соғайган беморлар сони аввалги кунларга нисбатан энг юқори кўрсаткични қайд этган ҳолда 38 нафарга етиб, жами 194 нафарни ташкил этгани хабар берилган.
Ўзбекистонда 19 апрель соат 18:00 ҳолатига кўра, коронавирус инфекциясини юқтириб олганлар сони 1543 нафарни ташкил этмоқда, ўтган вақт давомида касалликка чалинган беш нафар бемор вафот этган.
Бундан ташқари, сўнгги маълумотларга кўра, хориждаги 73 нафар ўзбекистонликда ҳам коронавирус аниқланган, уларнинг камида тўрт нафари вафот этган. Вафот этганларнинг уч нафари АҚШда, бир нафари эса Россияда бўлиб турган эди.
Изоҳ (0)