Бутун дунё бўйлаб коронавирус оқибатида вафот этганлар сони 160,7 минг кишидан ошиб кетди. Бу ҳақда касаллик тарқалишини реал вақтда кузатиб бораётган Жонс Ҳопкинс университети маълумотларида келтирилган.
COVID-19 коронавирус инфекцияси қурбонлари сони бўйича АҚШ етакчилик қилмоқда — мамлакатда 38,9 минг одам вафот этган. Уларнинг 13,1 минг нафари Нью-Йорк шаҳри ҳисобига тўғри келмоқда. 23,2 минг қурбон билан иккинчи ўринда Италия кетаётган бўлса, унинг ортидан Испания ўрин олган (20,6 минг).
Шунингдек, АҚШ коронавирус билан касалланганлар сони бўйича ҳам етакчилик қилмоқда: мамлакатда 735 мингдан ортиқ одамда коронавирус аниқланган. Бу Испания (194,4 минг), Италия (175,9 минг), Франция (152,9 минг) ва Германия (143,7 минг) давлатлари қўшиб ҳисобланганидан ҳам кўпроқ, демак.
Университет маълумотларига кўра, бутун дунёда 2,3 миллиондан ортиқ одам коронавирус билан касалланган.
Ўзбекистонда эса 19 апрель соат 10:00 ҳолатига кўра, коронавирус инфекциясини юқтириб олганлар сони 1495 кишига етди. Мамлакатда 15 мартдан буён коронавирусга чалинган беморларнинг беш нафари вафот этди, 194 нафари эса соғайиб, реабилитацияга олинган. Хорижда 73 ўзбекистонликда коронавирус аниқланган (энг кўпи — 42 нафари — Россияда), уларнинг тўрт нафари вафот этган.
Изоҳ (0)