Оксфорд университети олимлари томонидан ишлаб чиқилган, ҳали клиник синовлардан ўтказилмаган COVID-19 вакцинасини оммавий ишлаб чиқариш яқин ҳафталарда бошланади. Бу ҳақда Reuters хабар бермоқда.
17 апрель куни Оксфорд университети олимлари ишлаб чиқаришга параллел равишда клиник синовларининг биринчи босқичи учун кўнгиллилар жалб қилинаётганини билдирган. Клиник синовлар тўлиқ равишда сентябрга келиб якунланади. Унгача вакцинанинг қарийб миллионта дозаси ишлаб чиқарилади.
Университет раҳбари Адриан Ҳилл янги вакцинанинг мувафаққиятли бўлиши эҳтимоли 80 фоиз атрофида деб баҳоламоқда. Унинг айтишича, ушбу вакцина Буюк Британия (3 та), Европа (2 та), Ҳиндистон (1 та) ва Хитойда(1 та) жойлашган жами 7 та ташкилотлар томонидан ҳамкорликда ишлаб чиқарилади.
Reuters’да таъкидланишича, агар синов вакцинанинг муваффақиятли эканлигини кўрсатса, ундан шу заҳотиёқ оммавий фойдаланса бўлади, акс ҳолда кераксиз вакцина ишлаб чиқаришдан келадиган зарар миқдори бир неча 10 миллион фунт стерлингга тенг бўлади.
Айни пайтда вакцина бир қатор давлатлар, жумладан, АҚШ, Россия, Франция, Буюк Британия, Туркия ва Хитойда ишлаб чиқарилмоқда.
Дунёда биринчи бўлиб COVID-19 коронавирусига қарши вакцина синовдан ўтказилган одам америкалик Женнифер Халлер бўлди. Вакцина mRNA-1273 деб номланиб, у Сиэтлдаги Аллергия ва юқумли касалликлар миллий институтида яратилган. Синов учун 45 нафар кўнгилли танлаб олинган. Уларнинг ҳар бирига 28 кун давомида бир хил дозада 2 тадан инъекция қилинади ва улар 2021 йилнинг баҳорига қадар кузатувда бўлади.
Март ойи охирларида Британиядаги hVIVO тадқиқот гуруҳининг коронавирусга қарши вакцина ишлаб чиқиш ва шунга ўхшаш вирусни юқтириш дастурида иштирок этишга 20 мингдан ортиқ одам рози бўлган. 6 апрель куни Туркияда коронавирусга қарши вакцина ҳайвонларда муваффақиятли тест қилинган.
Аввалроқ БМТ бош котиби COVID-19 вакцинасини ишлаб чиқиш учун коалиция тузишни таклиф қилгани ҳақида хабар берилган эди.
Изоҳ (0)