Қишлоқ хўжалиги вазири ўринбосари Саидкамол Хўжаев карантин муддати чўзилган тақдирда ҳам қишлоқ хўжалиги маҳсулотлари етишмовчилиги юзага келмаслигини билдирди. Бу ҳақда «Дарё» мухбири хабар бермоқда.
Вазир ўринбосари ушбу маълумотни Ахборот ва оммавий коммуникациялар агентлиги ҳузурида ташкил этилган штабда бўлиб ўтган брифингда келиб тушган саволларга жавоб бериш асносида маълум қилди.
«Бунинг сабаби қишлоқ хўжалиги маҳсулотлари билан ички истеъмолни қондириб, экспорт қилиш имкониятига эга аграр давлат ҳисобланамиз. Карантин муддати чўзилиб кетса ҳам, жанубий вилоятлардаги миришкор деҳқонларимиз далаларида апрель ойидан бошлаб, озиқ-овқат маҳсулотлари ички бозорларимизга етказиб берила бошланган. Шунингдек, республиканинг барча ҳудудларидаги иссиқхоналарида помидор, бодринг, ширин қалампир ва бақлажон маҳсулотлари узлуксиз ички ва ташқи бозорларга етказиб берилмоқда. Бугунги кунда республика ҳудудларида қишлоқ хўжалиги маҳсулотларини етиштириш ҳажми кундан кунга ортиб бориши натижасида, пишиқчилик мавсумида ички ва ташқи бозорларга сифатли озиқ-овқат маҳсулотлари етказиб берилади. Бу даврда бизда муаммо бўлмаслиги аниқ», — дейди вазир ўринбосари.
Тиббий меъёрлар бўйича аҳолини мева-сабзавотларга бўлган талаби 10 миллион 300 минг тоннадан ортиқни, шундан картошка 1 миллион 784 минг тонна, сабзавотлар 4 миллион 440 минг тонна, мевалар 2 миллион 479 минг тонна, узум 593 минг тонна, полиз маҳсулотлари 583 минг тонна, дуккаклилар 115 минг тонна, гуруч 332 минг тоннани ташкил этиши айтилди.2020 йилда 24,8 миллион тонна (2019 йилга нисбатан 125 фоиз кўпроқ) 88 турдаги мева-сабзавотлар, шундан 42 турдаги 12,9 миллион тонна сабзавот, 5 турдаги 2,5 миллион тонна полиз, 3,5 миллион тонна картошка, 27 турдаги 3,3 миллион тонна мевалар, 3 турдаги 1,9 миллион тонна узум, 4 турдаги 630 минг тонна дуккакли ва 6 турдаги 139 минг тонна мойли маҳсулотлар етиштириш белгилаб олингани ҳам маълум қилинди.
Аҳоли талаби ва экспорт имкониятларини ҳисобга олиб етиштирилган маҳсулотларнинг 10,3 минг тоннаси аҳоли истеъмолига, 3,2 миллион тонна қайта ишлашга ва 2,3 миллион тоннаси экспортга йўналтирилиши таъкидланди.
Эслатиб ўтамиз, сал аввалроқ Олий Мажлис палаталари кенгашларининг қўшма қарорида Ўзбекистонда томорқадан самарали фойдаланмаётган хонадон эгалари огоҳлантирилиши, экин экмаганлар ер солиғини кўпроқ тўлаши маълум қилинган эди.
Изоҳ (0)