Коронавирусга қарши курашда ёрдам бериш учун 15 нафар хитойлик шифокор ва тиббиёт мутахассисидан иборат гуруҳ 17 апрель, жума куни, Ўзбекистонга келди. Бу ҳақда Соғлиқни сақлаш вазирлиги хабар берди.
Вазирлик томонидан маълум қилинишича, Ўзбекистон Президенти ташаббуси билан мамлакатга олиб келинган хитойлик шифокорлар ва тиббиёт мутахассислари Ўзбекистонда коронавируснинг олдини олиш, назорат қилиш ва даволашни ташкил этишда маҳаллий тиббиёт ходимларига яқиндан кўмаклашади.
Таъкидланишича, мазкур тиббий гуруҳ Хитойнинг Цзянси провинцияси маъмурий маркази Наньчан шаҳридан келган бўлиб, ушбу провинция Хубэй провинцияси билан чегарадош ва тузалиб кетган беморлар сони бўйича Хитойда биринчи ўринда туради.
Маълум қилинишича, тиббий гуруҳ таркибига вирусолог, эпидемиолог, пулмонолог, терапевт, жарроҳ ва юқумли касалликлар бўйича мутахассислар кирган. Улар орасида 2020 йилнинг январь—февраль ойларида Хитойда коронавирусга қарши миллий кураш доирасида шошилинч тиббий ёрдам кўрсатиш учун тўғридан-тўғри COVID-19 нинг тарқалиш маркази Ухань шаҳрига ва Хубэй провинциясининг бошқа шаҳарларига юборилган етакчи клиникаларнинг тажрибали шифокорлари ҳам бор.
Хитойлик шифокорлар билан бирга, Хитой ҳукумати номидан зарур тиббий буюмлар ва дори-дармонлар воситаларидан иборат гуманитар ёрдам ҳам Ўзбекистонга олиб келинди.
Хитойнинг Ўзбекистондаги элчихонаси 15 нафар хитойлик шифокор ва тиббиёт мутахассисларидан иборат гуруҳ COVID-19 коронавируси билан курашда Ўзбекистонга ёрдам бериш учун йўлга чиққани ҳақида хабар берганди.
Аввалроқ Шавкат Мирзиёев коронавирусга қарши кураш бўйича хитойлик мутахассислар Ўзбекистонга келишини маълум қилган эди.
Эслатиб ўтамиз, март ойининг охиридан буён Ўзбекистонда кореялик профессор, эпидемиолог Сой Чже Ук коронавирусга қарши курашда ўз ёрдамини кўрсатмоқда. Шунингдек, Ўзбекистонга коронавирусга қарши курашда ёрдам бериш учун Жанубий Кореядан яна бир мутахассис келиши кутилмоқда.
Изоҳ (0)