Андижон вилояти юқумли касалликлар шифохонасида навбатдаги 6 нафар коронавирусга чалинган бемор бутунлай соғайди. Улар вилоят соғлиқни сақлаш бошқармаси масъуллари иштирокида реабилитацияга кузатилди. Бу ҳақда Соғлиқни сақлаш вазирлиги хабар берган.
Тузалганларнинг барчаси коронавирус инфекциясига чалинган беморлар билан мулоқотда бўлиб, касалликни юқтириб олган. Беморларнинг 2 нафари эркак, 4 нафари аёллар. Уларнинг 4 нафари Андижон шаҳридан, 2 нафари эса Андижон туманидан. Улар орасида энг ёши каттаси 60 ёшда, энг ёши кичиги 20 ёшда. Эътиборли томони, вилоят юқумли касалликлар шифохонасидан шу пайтга қадар 4 нафар бемор соғайган бўлса, эндиликда улар 10 нафарни ташкил қилмоқда.
Соғайган беморлар вилоят юқумли касалликлар шифохонаси шифокорлари томонидан Жаҳон соғлиқни сақлаш ташкилоти тавсиялари асосида олиб борилган тўғри даволаш муолажалари туфайли дарддан тўлиқ фориғ бўлган.
Шундай қилиб, Ўзбекистон бўйлаб коронавирус инфекциясидан бутунлай соғайган беморлар 153 нафарга етган.
Аввалроқ Наманганда коронавирусга чалинган яна 7 киши соғайгани ва Ўзбекистонда тузалганлар сони 147 нафарга етгани хабар қилинганди.
16 апрель куни Тошкентда 70 ёшли бемор коронавирусдан тузалиб, Ўзбекистонда тузалганлар сони 129 нафарга етган эди. Ўзбекистонда 17 апрель соат 16:00 ҳолатига кўра, коронавирус инфекциясини юқтириб олганлар сони 1390 нафарни ташкил этмоқда. Мамлакатда 15 мартдан буён коронавирусга чалинган беморларнинг тўрт нафари вафот этди, бундан ташқари, хорижда камида 23 ўзбекистонликда коронавирус аниқланган, уларнинг тўрт нафари вафот этган.
Изоҳ (0)