Ўзбекистон бўйлаб коронавирус инфекциясидан бутунлай тузалган беморлар сони кундан кунга ошиб бормоқда. Тошкент шаҳри, Хоразм, Наманган, Фарғона, Андижон, Бухоро ва Қашқадарё вилоятлари сафига эндиликда Қорақалпоғистон Республикаси ҳам ҳам қўшилди. Бу ҳақда Соғлиқни сақлаш вазирлиги жамоатчилик билан алоқалар бўлими хабар берган.
Хабарга кўра, Қорақалпоғистонда коронавирус инфекциясига чалинган 3 нафар бемор бутунлай соғайган ва юқумли касалликлар шифохонасидан Соғлиқни сақлаш вазирлиги масъуллари иштирокида реабилитацияга кузатилган.
Коронавирусдан фориғ бўлган беморларнинг бири Тошкент шаҳридан, у Тошкент—Қўнғирот йўналишидаги йўловчи поездда Қорақалпоғистонга борган вақтида тест қилинган ва беморда коронавирус инфекцияси борлиги аниқланганди. Қолган икки нафар фуқаро эса Нукус шаҳрида яшовчи ота-бола, улар касалликни коронавирус билан касалланганлар билан мулоқот орқали юқтириб олган.
Ўзбекистонда коронавирус инфекциясидан бутунлай соғайганлар 17 апрель ҳолатига кўра, 27 нафарга етиб, COVID-19 дан тузалганларнинг умумий сони эса 156 нафарни ташкил этмоқда.
Аввалроқ Андижонда яна 6 нафар бемор коронавирусдан тўлиқ соғайиб, реабилитацияга кузатилгани, Наманганда коронавирусга чалинган яна 7 киши соғайгани ва Ўзбекистонда тузалганлар сони 153 нафарга етгани хабар қилинганди.
16 апрель куни Тошкентда 70 ёшли бемор коронавирусдан тузалиб, Ўзбекистонда тузалганлар сони 129 нафарга етган эди. Ўзбекистонда 17 апрель соат 16:00 ҳолатига кўра, коронавирус инфекциясини юқтириб олганлар сони 1390 нафарни ташкил этмоқда. Мамлакатда 15 мартдан буён коронавирусга чалинган беморларнинг тўрт нафари вафот этди, бундан ташқари, хорижда камида 23 ўзбекистонликда коронавирус аниқланган, уларнинг тўрт нафари вафот этган.
Изоҳ (0)