Пандемия туфайли Туркманистон—Эрон йўналиши бўйича узилиб қолган ташув йўналиши Ақтау ва Амиробод портларига кўчган. Бу ҳақда 16 апрель-куни «Ўзбекистон темир йўллари» АЖ бошқарма бошлиғи Умидулла Ибрагимов АОКА ҳузуридаги штабда бўлиб ўтган брифингда айтиб ўтди.
Брифингда «Ўзбекистон темир йўллари» жамияти масъулининг маълум қилишича, ҳозирда Ўзбекистон ҳудудидан ўтувчи экспорт-импорт учун мўлжалланган 13 та коридор мавжуд бўлиб, улар орқали дунёнинг 20 дан ортиқ портига маҳсулот етказиб бериш имконияти бор.
«Яқин кунларда Туркманистон—Эрон йўналиши бўйича пандемия туфайли узилиб қолган ташувни тиклаш мақсадида Қозоғистоннинг Ақтау ва Эроннинг Амиробод портлари орқали экспорт-импорт юкларини етказиб бериш йўлга қўйилди», — деди Умидулла Ибрагимов
Унинг қўшимча қилишича, ҳозирда «Ўзбекистон темир йўллари» ғарбий йўналиш бўйича Москва, Рига, Минск, Брест, Одесса, Поти, Истанбул ва шарқий йўналиш бўйича Жалолобод, Хоргос, Владивосток, Находка шаҳарларигача экспорт-импорт ташувларини жадал суръатларда, мижозларга имкон қадар қулайлик яратган ҳолда бетиним амалга ошириб келмоқда.
Изоҳ (0)