Ички ишлар вазирлиги ўзбошимчалик билан ўз транспорт воситаларига рухсатнома берган ташкилот ва корхоналарни маълум қилди

17 апрель куни АОКА ҳузурида ташкил этилган штабда бўлиб ўтган брифингда Ички ишлар вазири матбуот котиби Шоҳрух Ғиёсов карантин даврида кўчада турли ташкилотларнинг автомобиллари учун қилинган рухсатномалари учраётгани, улар ҳаракатланишга асос бўлмаслигини билдирди. Бу ҳақда «Дарё» мухбири хабар берди.

Жумладан, махсус стикерсиз ҳаракатланишга рухсат этилган вазирликлар, давлат қўмиталари, агентликлар ва бошқа давлат ва хўжалик бошқаруви органлари хизмат автотранспорт воситаларининг ҳайдовчилари, кўплаб суиистеъмолчиликларга йўл қўяётганликлари кузатилаётгани таъкидланди.

ИИВ матбуот котиби йўл ҳаракати хавфсизлиги ходимлари ҳар бир автотранспортни визуал кўздан кечириб, автотранспорт йўналиши ва аниқ манзили юзасидан тушунтиришлар сўраши давомида дуч келинган қоидабузарликларни маълум қилди.

Қоидабузарлик содир этганлар сафида қуйидаги ташкилот ва корхоналарни учратиш мумкин:

• Ўзбекистон Республикаси Фанлар академияси;
• Ўзбекистон истеъмолчилар ҳуқуқларини ҳимоя қилиш жамиятлари федерацияси;
• Ўзбекистон Республикаси Вазирлар Маҳкамаси ҳузуридаги давлат захираларини бошқариш қўмитаси (Ўздавзахира);
• «Ўзбекнефтгаз» Чинобод нефть базаси масъулияти чекланган жамияти;
• Ўзбекистон Республикаси ветеринария ва чорвачиликни ривожлантириш давлат қўмитаси;
• «Саид Али савдо» масъулияти чекланган жамияти;
• «Зулфия Агро» масъулияти чекланган жамияти;
• «Тошкент тумани деҳқон бозори» масъулияти чекланган жамияти;
• Республика маънавият ва маърифат маркази Тошкент шаҳар бўлими.

Эндиликда, юқоридаги ҳолатлардан келиб чиққан ҳолда вазирликлар, давлат қўмиталари, агентликлар ва бошқа давлат ва хўжалик бошқаруви органлари, Қорақалпоғистон Республикаси Жўқорғи Кенгеси ва Вазирлар Кенгаши раислари ва уларнинг ўринбосарлари, ҳокимлар ва уларнинг ўринбосарлари хизмат автотранспорт воситалари ҳайдовчиларига фақат иш вақтида, хизмат зарурати билан ҳаракатланишга рухсат этилиши хабар қилинди.