«Шарқшунослик соҳасида кадрлар тайёрлаш тизимини тубдан такомиллаштириш ва илмий салоҳиятни ошириш чора-тадбирлари тўғрисида» Президент қарори имзоланди.
Қарорга кўра, Тошкент давлат шарқшунослик институти негизида Тошкент давлат шарқшунослик университети ташкил этилади.
2020—2021-ўқув йилидан бошлаб университетга таълим стандартларини ишлаб чиқиш, малакавий талаблар, ўқув режалари ва дастурларини, шунингдек, илғор халқаро тажрибани ҳисобга олган ҳолда талабаларнинг билимини баҳолаш ҳамда ўқув жараёнининг амалиёт билан интеграциялашувини таъминлаш тизимини ишлаб чиқиш ва тасдиқлаш ҳуқуқи берилади.
Университетда таълим жараёни босқичма-босқич кредит-модуль тизими асосида амалга оширилади. Хорижий олий таълим муассасалари билан ҳамкорликда ташкил этиладиган қўшма таълим дастурларининг ўқув режалари ва фан дастурлари университет томонидан хорижий ҳамкорлар билан келишилган ҳолда мустақил тасдиқланади.
Тошкент давлат шарқшунослик университетига ўқишга қабул қилишда шарқ тилларидан (турк, араб, форс, дари, ҳинд, урду, хитой, корейс, уйғур, япон тиллари) топшириладиган кўп балли тизим бўйича имтиҳонлар ўрнига тест синовлари ўтказилади. Ушбу тажриба бошқа тиллар (испан, италян, тожик, қозоқ, туркман, қирғиз тиллари ва бошқалар) бўйича республикадаги барча давлат олий таълим муассасаларига ўқишга қабул қилишда жорий этилади.
Университетда шарқ тиллари ўқитиладиган таълим муассасалари ўқитувчилари учун доимий фаолият юритувчи қайта тайёрлаш ва малака ошириш курслари ташкил этилади ҳамда курслардан муваффақиятли ўтган педагог кадрларга белгиланган намунадаги сертификат берилади.
Тошкент автомобиль йўлларини лойиҳалаш, қуриш ва эксплуатацияси институтининг Тошкент шаҳри, Миробод тумани, Амир Темур шоҳ кўчаси, 20а-уй манзилида жойлашган бино ва иншоотлари тегишли ҳудуди билан биргаликда университетга беғараз ўтказиб берилади. 2021 йил 1 августга қадар ушбу ҳудудда университетнинг янги 9 қаватли биноси ва спорт мажмуаси қурилиб, фойдаланишга топширилади.
Аввалроқ Самарқанд давлат тиббиёт университети ташкил этилиши ҳақида хабар берилган эди.
Изоҳ (0)