Навоий вилояти ИИБ ахборот хизмати Хатирчи туманида карантин вақтида оилавий жанжал оқибатида аканинг укага тан жароҳати етказганлиги ҳақида хабар берди.
Хабарга кўра, 2020 йил 11 апрель куни Хатирчи тумани ИИБга туман марказий шифохонасидан телефон орқали мурожаат келиб тушган. Унда 1990 йилда туғилган, Хатирчи туманида истиқомат қилувчи фуқаро К.А. тан жароҳати олган ҳолда касалхонага ётқизилганлиги маълум қилинган.
Туман ИИБ ҲПБ ходимлари олиб борган суриштирув натижаларига кўра, К.А.га 1984 йил Хатирчи туманида туғилган акаси К.Б. ўзаро оилавий келишмовчиликлар сабаб тан жароҳати етказгани аниқланган.
Мазкур ҳолат юзасидан К.Б. қонуний тартибда жазога тортилган, дейилади хабарда. Навоий ИИБ ахборот хизмати вазиятни ўрганиш жараёнида аниқланган сабаблар ва оқибатлар жиноят мотиви учун ўта содда экани ойдинлашгани ҳақида ёзган. Карантин муддатида зерикиш ва руҳий зўриқишни ваъж қилган ҳолда жаҳлни бошқара олмаслик, иродасизлик ҳамда шошқалоқлик қондош жигарларнинг бир-бирига тазйиқ ўтказишига сабаб бўлганини баён қилган, аммо хабарда ака-уканинг ўзаро жанжалига айнан нима сабаб бўлгани очиқланмаган.
Аввал март ойида Сирдарёдаги жанжалда темир қайчи билан одамга оғир тан жароҳати етказган шахс ушлангани, шунингдек, Тошкент вилояти Нурафшон шаҳрида кекса одамларга тан жароҳати етказган одамнинг қўлга олингани ҳақида хабарлар берилган.
Изоҳ (0)