Қашқадарё ИИБ ЙПХ инспектори ҳайдовчининг ёқасидан тортиб, машинадан туширишга уринганини тан олди. Бу ҳақда вилоят ИИБ ахборот хизмати маълум қилмоқда.
2020 йил 15 апрель куни ижтимоий тармоқларда ЙПХ инспектори ҳайдовчининг ёқасидан тортиб, машинадан туширишга ҳаракат қилаётгани акс этган видео тарқалди.
Ушбу видеотасвирга муносабат билдирган вилоят ИИБ воқеа жорий йил 14 апрель куни бўлиб ўтганини маълум қилди.
«Қарши шаҳрида COVID-19 касаллиги тарқалишининг олдини олиш мақсадида 2020 йил 14 апрель куни эрталабки хизмат тақсимотига асосан вилоят ИИБ ЙҲХБ ЙПХБ 1-ЙПХ отряди 1-сафарбарлик гуруҳи инспектори, сафдор Б.Омонтурдиев Қарши шаҳридаги Жайҳун ва Насаф кўчалари кесишган чорраҳада хизматга жалб қилинган.
Шу куни соат тахминан 14:00 ларда Labo русумли 70 171 VАА давлат рақам белгили автомашина ҳайдовчиси бир неча бор унинг олдидан ўтиб-қайтиб, ‘Командир, нотўғри тушунмайсиз, сизларнинг ташкилотларингиздан каттароқ ташкилотдан рухсат олиб қўйганмиз’ деб айтганида инспектор уни тўхтатиб, ‘Тўғри, сизда махсус рухсатнома бор, лекин бу рухсатнома мақсадсиз кўчада юриш учун берилмаган’, деб огоҳлантириб қўйиб юборган», — дейилади ИИБ ахборотида.
Вилоят ИИБ ЙПХ инспекторининг айбини тан олиб, ҳайдовчининг ёқасидан тортганини таъкидлайди.
«Сафдор Б.Омонтурдиев Миллий гвардия ходими сержант Ж.Ҳақбердиев билан соат тахминан 17:00 ларда Жайҳун кўчасидан келаётган автомашиналарни Насаф кўчаси орқали И.Каримов кўчасига, яъни шаҳар марказий кўчаларига ҳаракатланишини чеклаб турган вақтда Labo русумли 70 171 VАА давлат рақам белгили автомашина ҳайдовчиси келиб, ‘Қоч, кўрмаяпсанми рухсатномам бор’, дейди. Шунда сафдор Б.Омонтурдиев ва сержант Ж.Ҳақбердиев ҳайдовчини автомашинадан тушириб, орқадаги бошқа машиналарда ҳам махсус рухсатнома борлигини, лекин улар тўғри тушуниб шаҳар атрофи бўйлаб ҳаракатланаётганлигини кўрсатмоқчи бўлган. Ҳайдовчининг машинадан тушишини талаб қилган ва ёқасидан ушлаб тортган. Ҳайдовчининг ёнида бўлган фуқаро ушбу ҳолатни тўлиқ видеотасирга олган бўлса-да, айнан ЙПХ ва Миллий гвардия ходимлари томонидан ҳайдовчининг ёқасидан тортиб туширмоқчи бўлган қисмини олиб, ижтимоий тармоқларга тарқатган», — дея ахборот беради вилоят ИИБ.
Қўшимча қилинишича, мазкур ҳолат юзасидан вилоят ИИБ масъул ходимлари томонидан хизмат текширув ўтказилмоқда.
Изоҳ (0)