Ўзбекистон мусулмонлари идораси раисининг биринчи ўринбосари Ҳомиджон Ишматбеков 16 апрель куни АОКАда ўтказилган брифинг давомида бир қанча саволларга жавоб берди. Бу ҳақда «Дарё» мухбири хабар бермоқда.
Маълум қилинишича, нисоб (мусулмонларнинг закот бериш мажбуриятини келтириб чиқарувчи пул ёки мол-мулкининг миқдори) ҳар йили Ўзбекистон мусулмонлари идораси Фатво ҳайъати томонидан Рамазон ойида эълон қилинар эди. Лекин мамлакатда карантин эълон қилиниши сабабли заруратсиз уйдан ташқарига чиқиш мумкин бўлмаган вазиятда Ўзбекистон мусулмонлари идораси закот нисобини Шаъбон ойида чиқаришга қарор қилган.
Шунингдек, брифинг давомида айнан закот масаласида келиб тушган саволларга ҳам тўхтаб ўтилди.
Қўлига бир жойдан 25 миллион сўм келиб қолган киши закот берадими?
«Пул нисобга етганидан кейин бир йил ўтсагина, закот фарз бўлади. Бир йилдан оз вақт давомида нисобдан кам бўлиб қолса, закот фарз бўлмайди. Бундай закотга йил ҳижрий сана ҳисоби билан ўлчанади. Пул қўлга тушганидан кейин бир йил ўтиши шарт эканлиги қуйидаги ривоят билан далилланади:
Ҳазрати Али каррамаллоҳу важҳаҳудан ривоят бўладики, «Бир йил тўлмагунига қадар мол-мулкдан закот йўқ», дейдилар. Ушбу мазмундаги Ҳазрати Алидан бошқа саҳобаларда ҳам саҳиҳ асарлар мавжуд. Бу гарчи саҳобаларнинг сўзи бўлса-да, уламолар ҳукм жиҳатидан марфу’, яъни Пайғамбар алайҳиссаломнинг сўзларидан келиб чиққанини таъкидлайдилар.»
Ота-она, ака-ука, опа-сингиллар ҳақиқатан закот олишга ҳақли бўлса, уларга закот бериш мумкинми?
«Закотни ўзаро туғилиш алоқаси бўлганлар, яъни ота-онаси, бобо-бувиси, ўғил-қизлари ва набиралари, эр-хотинлик алоқалари бўлганлар, яъни эр ёки хотин бир-бирига бериши мумкин эмас. Аммо ака-ука, опа-сингилларга закот бериш мумкин. Закот бериш яқин қариндошлардан бошланса ҳам Оллоҳ таолонинг буйруғи адо бўлади, ҳам қариндош-уруғлик ришталари мустаҳкамланади. Яъни силаи раҳимга амал қилинган бўлади.»
Аввалроқ Ўзбекистон мусулмонлари идораси 2020 йил учун закот миқдорини маълум қилган эди. 7 апрель куни Ўзбекистон мусулмонлари идораси карантинга доир фатволарни эълон қилган.
Изоҳ (0)