Ўзбекистонда неча киши карантин қоидаларини бузгани учун жавобгарликка тортилгани маълум қилинди

ИИВ хабарига кўра, Ўзбекистонда карантин тадбирлари эълон қилинган вақтдан бугунги кунга қадар белгиланган қоидаларга амал қилмаслик билан боғлиқ жами 68 239 та ҳолат аниқланди.

Қайд этилишича, энг кўп — 11 867 та қоидабузарлик Тошкент шаҳрида аниқланмоқда. Тошкент вилоятида эса бундай ҳолатлар сони 9 907  тани ташкил этмоқда. Республиканинг бошқа ҳудудларида аниқланган қоидабузарликлар сони эса қуйидагича:

• Фарғона вилоятида – 10 350 та;
• Самарқанд вилоятида – 6 226 та;
• Сирдарё вилоятида – 4 857 та;
• Қашқадарё вилоятида – 4 596 та;
• Наманган вилоятида – 3 889 та;
• Андижон вилоятида – 3 785 та;
• Бухоро вилоятида – 2 819 та;
• Қорақалпоғистон Республикасида – 2 479 та;
• Хоразм вилоятида – 2 309 та;
• Жиззах вилоятида – 2 236 та;
• Сурхондарё вилоятида – 2 216 та;
• Навоий вилоятида – 703 та ҳолатни ташкил этмоқда.

Эслатиб ўтамиз, коронавирус инфекцияси тарқалишига қарши кураш доирасида Тошкент шаҳри ва бир қатор шаҳарларга транспортнинг кириш-чиқиши чекланди, вилоятлараро транспорт ҳаракати тўхтатилди, шахсий автомобилда махсус рухсатномасиз ҳаракатланиш тақиқланди, фуқароларга заруратсиз уйдан чиқмаслик тавсия этилди. Ўзбекистоннинг йирик шаҳарларида «ўзини яккалаш» тартиби жорий этилди. Тошкент шаҳрининг 11 та туманидаги 514 та маҳалла қошида карантин тартибини назорат қилувчи «Жамоатчилик назорати маскани» ташкил этилди.Айни пайтда Ўзбекистонда карантиннинг қачон тугаши  номаълум. У Республика махсус комиссияси қарорига кўра амалга оширилади. Бош вазир ўринбосари — иқтисодий ривожланиш ва камбағалликни қисқартириш вазири Жамшид Қўчқоров Ўзбекистонда карантин май ойида ҳам давом этиши эҳтимоли анча катталигини айтганди.

Аввалроқ Ўзбекистонда фуқароларга карантин қоидаларини бузганлиги ҳақида SMS жўнатиб, пул ундирмоқчи бўлаётган фирибгарлар пайдо бўлгани маълум қилинганди.