Соғлиқни сақлаш вазирлиги ҳузуридаги Коронавирусга қарши кураш штаби аъзоси Ҳабибулла Оқилов 16 апрель куни АОКАда ўтказилган брифингда фуқаролар томонидан йўлланган коронавирус билан боғлиқ саволларга жавоб қайтарди.
«Дарё» мухбирининг хабар беришича, Оқилов коронавирусга чалинган ва хасталиги оғир беморларни даволашда мазкур касалликдан шифо топганларнинг қон зардобидан қай даражада фойдаланилаётгани ҳақидаги саволга жавоб бераркан, ҳозиргача Ўзбекистонда бу усулга мурожаат қилинмаганини таъкидлади.
«Биз хитойлик ҳамкасбларимизнинг тажрибасини ўрганиб чиқдик ва бугунги кунда Ўзбекистон қон зардобидан фойдаланишга тайёр. Лекин шу кунга қадар бу усулдан фойдаланишга ҳали эҳтиёж туғилгани йўқ», — деди Ҳабибулла Оқилов.
Эслатиб ўтамиз, Ўзбекистонда эндиликда коронавирусга чалинган беморларни даволаш учун соғайиб кетганларнинг қон зардобидан антитана мақсадида фойдаланилиш йўлга қўйилиши, бу касаллик оғир кечаётган ёки узоқ давом этаётган беморларга вирусни тезроқ ва осонроқ енгиш учун қўшимча курашиш манбаи бўлиб хизмат қилиши ҳақида хабар берилган эди. Бундай даволаш усули Буюк Британия шифокорларида катта қизиқиш уйғотганди.
Айни пайтда Ўзбекистонда коронавирусга чалинганлар сони 1349 кишига етди. Уларнинг тўрт нафари вафот этди, 107 нафари соғайиб, реабилитацияга олинди.
Изоҳ (0)