Транспорт вазирлиги карантинда хизмат қилаётган юзлаб автобус ҳайдовчилари меҳнатини арзимас тушунмовчилик сабаб йўққа чиқармасликни сўради

Ўзбекистон Транспорт вазирлиги карантин вақтида хизмат қилаётган юзлаб автобус ҳайдовчилари меҳнатини арзимас тушунмовчилик сабаб йўққа чиқармасликни сўради. Бу ҳақда вазирлик матбуот хизмати хабар бермоқда.

Таъкидлашича, коронавирус сабаб Ўзбекистонда карантин эълон қилинганидан буён бир неча ҳафта ўтди. Ушбу муддатда мазкур вирус билан касалланганлар минг нафардан ошди. Ана шундай мураккаб шароитда ҳукумат барча зарур чораларни қўллаб, кечиктириб бўлмайдиган тадбирларни амалга ошириб келмоқда.

Хусусан, «Тошшаҳартрансхизмат» АЖ зиммасига транспорт билан таъминлаш юклатилган. Карантин даврида муддатни ўтаб бўлган фуқароларни карантин ҳудудидан олиб чиқиш ва уларни марказлашган тартибда яшаш манзилларига етказиш ҳамда шаҳардаги бошқа клиникалардан қарийб 7 мингга яқин фуқароларни карантин ҳудудига олиб боришга жамиятнинг 200 дан ортиқ автобуслари хизмат қилиб келмоқда. Бундан ташқари хориждан олиб келинган 5 мингга яқин фуқароларни карантин ҳудудларига олиб боришга қарийб 170 та автобус ажратилган.

«Албатта, мазкур хизматни ташкил этишда автобусларнинг техник ҳамда санитарик ҳолатини талаб даражасига келтиришда жамиятнинг юзлаб ишчи ходимлари тинимсиз меҳнат қилмоқда. Юзлаб ҳайдовчилар соғлиқларини хавф остига қўйиб, касаллик ўчоқларига кириб бормоқда.

Ўз ўрнида таъкидлаш лозимки, карантин муддатида касалликнинг олдини олиш мақсадида амалга оширилаётган ҳар бир саъй-ҳаракатни қадрлаш, шунга монанд муносабат билдириш лозим. Жумладан, кўрсатилаётган автобус хизматларидан оқилона фойдаланишимиз, транспорт воситаларини асраб-авайлашимиз шарт», — дейилади хабарда.

Шунингдек, манзилларига етказилаётган айрим фуқаролар автобусларни уй йўлакларигача олиб боришлари ёки катта ҳажмдаги транспорт воситаларини тор кўчалардан юришга мажбур қилиш ҳолатларининг учраётгани бошқа йўловчилар хавфсизлигига рахна солиш билан бирга баъзан автобусларнинг шикастланишига ҳам олиб келаётгани қайд этилган. Ана шундай ҳолатларда ҳайдовчи ва фуқаролар ўртасида тушунмовчиликлар ҳам юзага келаётгани таъкидланган.

«Албатта, ‘Тошшаҳартрансхизмат’ АЖ автобуслари ҳамиша хизматингизда. Аммо улардан самарали фойдаланишда сиз ҳам масъулиятли бўлинг. Қолаверса, кўрсатилаётган кенг кўламдаги хизматлар ҳамда унинг ортидаги юзлаб кишиларнинг меҳнатларини арзимаган тушунмовчиликлар сабаб йўққа чиқарманг», — дейди вазирлик ва айни кундаги мураккаб шароитда кўрсатилаётган транспорт хизмати билан боғлик муаммолар юзага келса, жамиятнинг 1062 ишонч телефонига мурожаат қилишни сўраган.