«Ҳудудгазтаъминот» АЖ Самарқанд вилояти Каттақўрғон шаҳаридаги икки қаватли уйда содир бўлган портлаш юзасидан расмий маълумот берди.
«2020 йилнинг 12 апрель куни эрталаб чамаси 07:20 лар атрофида Самарқанд вилояти Каттақўрғон шаҳридаги икки қаватли турар-жой биноларидан бирида ҳаво-газ аралашмаси натижасида чақнаш содир бўлди.
Ушбу ҳолатни ўрганиш бўйича зудлик билан ‘Ҳудудгаз Самарқанд’ МЧЖ бош директори Холмурод Бобомуродов бошчилигидаги мутахассислардан иборат ишчи гуруҳ тузилди. Ўрганиш давомида қуйидагилар аниқланди.
Чақнаш содир бўлган ушбу икки қаватли, ертўласиз ҳамда иккита кириш йўлагига эга турар жой биноси 1960 йилда қурилган ва газ таъминотига уланган. Хонадонларда газ плиталари мавжуд, аммо иситиш тизими мавжуд эмас.
‘Ҳудудгаз Самарқанд’ МЧЖ мутахассисларининг ўрганиш бўйича хулосаларига кўра, чақнаш содир бўлган хонадонда ‘Брест’ маркали тўрт кампаракли (кўзли) газ плитаси барча техник талабларга жавоб берган, хонадондаги газ қувурлари ҳам соз ҳолатда бўлганлиги аниқланди.
Содир бўлган ҳодисага эса газ жиҳозларидан фойдаланишдаги эҳтиётсизлик сабаб бўлган. Хонадон эгалари газ плитасига чойнакда сув қўйиб, ошхонани тарк этган. Сув қайнагач, хонадон эгалари томонидан ўз вақтида ўчирилмаганлиги сабабли қайнаётган сув тошиб, оловни ўчирган. Газ сизиб чиқишининг давом этиши оқибатида ошхонада хавфли ҳаво-газ аралашмаси тўпланган. Хонадон эгаси хонани шамоллатмасдан туриб, гугурт ёқиб юборган ва чақнаш содир бўлган. Оқибатда хонадонда яшовчи уч нафар фуқаро ҳалок бўлган, тўрт нафари эса турли даражадаги тан жароҳатларини олган», — дейилади «Ҳудудгазтаъминот» АЖ ахборот хизматининг хабарида.
12 апрель куни Каттақўрғон шаҳридаги аҳоли яшовчи кўп қаватли уйда портлаш содир бўлгани, портлаш оқибатида 2 киши ҳалок бўлгани ва 5 киши жароҳатлангани, кейинроқ ҳалок бўлганлар сони уч кишига етгани, портлаш юзасидан жиноят иши қўзғатилгани ҳақида хабарлар берилган.
Изоҳ (0)