Исроил коронавирус пандемиясида хавфсизлик даражаси бўйича мамлакатлар рейтингида 1-ўринни эгаллади

Исроил Deep Knowlegde Group (DKG) консорциуми сайтида эълон қилинган коронавирус пандемияси шароитида хавфсизлик даражаси бўйича рейтингда биринчи ўринни эгаллади.

Натижаларга кўра, кучли ўнликка Австралия, Хитой, Тайвань, Гонконг, Янги Зеландия, Сингапур ва Япония ҳам кирган. Ўзбекистон 40 та мамлакат кирган рўйхатдан ўрин олмаган.

Бундан ташқари DKG пандемия шароитида фуқаролари оғир аҳволда қолган давлатлар рейтингини ҳам эълон қилди. Ушбу рўйхатнинг дастлабки бешлигида Италия, АҚШ, Буюк Британия, Испания ва Франция жойлашган. Улардан кейин Швеция, Эрон, Эквадор, Филиппин ва Руминия қайд этилган. Россия ушбу рўйхатда 12-поғонани эгаллаган.Рейтингни тузишда таҳлилчилар касаллик тарқалишининг олдини олиш бўйича қачон чеклов чоралари қўлланилгани ва қандай ҳажмдаги ишлар амалга оширилганига эътибор қаратган. Шунингдек, карантиннинг давомийлиги бўйича маълумотлар, унинг фуқаролар томонидан бузилиши, давлат томонидан иқтисодий қўллаб-қувватлаш чоралари ҳам ҳисобга олинган. Тадқиқот муаллифлари рейтингга кирган мамлакатларда коронавирусга тест олишнинг кенг қамровли ёки аксинча паст даражада эканига, шу билан бирга соғлиқни сақлаш тизимидаги ресурсларга ҳамда ҳукуматлар амалга ошираётган бошқа чора-тадбирларни эътиборга олган.

DKG расмий сайтида ёзилишича рейтингни тузишда асосан очиқ ахборот манбаларидаги маълумотлардан, жумладан, Жаҳон соғлиқни сақлаш ташкилоти, Жонс Ҳопкинс университети томонидан берилаётган ахборотлардан фойдаланилган.

Таҳлилчилар маълумотларнинг доимий равишда янгиланаётганини ва келажакда ушбу рейтингдаги ўринлар ўзгариши мумкинлигини инкор этмаган.

Жаҳон соғлиқни сақлаш ташкилоти 11 март куни COVID-19 коронавирусининг тарқалишини пандемия даражасига чиққанини эълон қилган. 14 апрель ҳолати бўйича ЖССТ берган маълумотларга асосан бутун дунёда 1,9 миллион нафардан ортиқ одамда коронавирус юқтириб олиш ҳолати кузатилган, касалликдан вафот этганлар сони 113 минг нафардан ошган.