АҚШнинг диабет бўйича ассоциацияси экспертлари қандли диабетга чалинган беморлар учун COVID-19 нинг қай даражада хавфли эканини тушунтириб берди. Шифокорларнинг бу борадаги маълумотларини Medical Xpress нашри эълон қилган.
Диабет билан касалланганлар коронавирус юқтириб олишининг эҳтимоли бошқаларга нисбатан юқори эмас, аммо SARS-CoV-2 ни юқтириб олиш яна қўшимча касалликларга чалиниш ва касалликнинг оғирлашишига сабаб бўлиши мумкин. АҚШдаги диабет бўйича ассоциациянинг президенти Роберт Экель Америка касалликлар назорати ва профилактикаси Маркази (CDC) маълумотлари асосида шундай хулосага келган. Ушбу ташкилот ахбороти бўйича мамлакатда коронавирусни юқтириб олганларнинг 10 фоизигина қандли диабет беморлари ҳисобланади.
Экель диабети борлар орасида ўлим сонининг кўплигига коронавирус тарқалишида юрак хасталиклари билан боғлиқ вазиятнинг кескинлашганини сабаб қилиб кўрсатди. Мутахассиснинг айтишича, ушбу муаммо бўйича ҳали аниқ бир тўхтамга келишнинг иложи йўқ, чунки бу борада керакли маълумотлар етишмайди. Тиббиёт ходимлари қандли диабет билан касалланган беморларга карантин қоидаларига ва ижтимоий масофа сақлашга амал қилиш, қўлни тез-тез ювиш ва иложи борича юзга кўп тегинмасликни тавсия қилган. Шунингдек, CDC вакиллари бурун ва оғиз бўшлиғини тиббий ниқоб билан ҳимоялашни ҳам маслаҳат берган, бироқ бу тавсия АҚШнинг барча фуқароларига тегишли эмас.
Роберт Экель COVID-19 ни юқтириб олган қандли диабети бор бемор касалхонага тушса, ўзи билан қанд касаллиги вақтида ичадиган барча препаратларини ҳам олиши лозимлигини таъкидлади. У бунинг сабабини айрим клиникаларда дорилар танқислиги кузатилиши, шифокорлар ҳам беморга барча дориларни, айниқса, инсулинни бирга олишни тавсия этганини айтиб ўтди.
14 апрель ҳолати бойича ўтган бир сутка давомида Москва шаҳрининг ўзида 13 нафар бемор коронавирусдан вафот этган. Россия пойтахтидаги инфекцияга қарши курашиш бўйича тезкор штаб ўлганларнинг кўпчилигида бошқа касалликлар ҳам бўлгани, жумладан, беш нафар беморда қандли диабет хасталиги борлигини қайд этган. Россияда COVID-19 оқибатида вафот этганларнинг умумий сони 170 нафарга етган, Москванинг ўзида 95 нафар бемор коронавирусдан вафот қилган. АҚШда қарийб 582 минг кишида коронавирус аниқланган бўлиб, жами қурбонлар сони 23 621 кишини ташкил қилган.
Изоҳ (0)