Россия Қуролли Кучларида коронавирус билан касалланиш бўйича камида учта ҳолат аниқланган. Бу ҳақда «Коммерсантъ» нашри 30 март куни ушбу маълумотлар билан танишган ўзининг манбасига таяниб хабар берди.
Ҳарбий идора ҳукуматга юборган материалларга кўра, 1994 йилда туғилган прапоршик (уйида даволанмоқда), полковник (ҳозирда Коммунаркадаги шифохонада), шунингдек, Шимолий флот мичманида (шифохонада) касаллик аниқланган.
Таъкидланишича, коронавирусни юқтириб олганлар билан 60 дан ортиқ ҳарбий хизматчи мулоқотда бўлган. Ўз навбатида, улар билан 130 дан ортиқ аскар алоқада бўлган. Уларнинг барчаси изоляцияланган, бироқ бирортасида инфекция аниқланмаган.
Мудофаа вазирлиги касаллар сони кўпроқ бўлишига тайёргарлик кўриб қўйган. Ҳарбий-тиббий ташкилотларда 4800 дан ортиқ жой, шунингдек, касалларни қабул қилишга 32 та ҳарбий госпитал тайёрланган. Бундан ташқари, 30 мартдан бошлаб 700 кишини қабул қилишга қодир еттита мобил госпиталлар шакллантирилган.
Таъкидланишича, мамлакатда коронавируснинг тарқалиши баҳорги чақирув тўғрисидаги қарорга таъсир кўрсатмаган. Россия президенти Владимир Путиннинг тегишли фармонига кўра, 15 июлга қадар мамлакат Қуролли Кучлари 135 минг аскар билан бутланади.
Аввалроқ Россия Соғлиқни сақлаш вазирлиги мамлакатда коронавирусга қарши препарат ишлаб чиқилганини эълон қилгани ҳақида хабар берилганди.
Сўнгги маълумотларга кўра, Россияда коронавирус билан касалланганлар сони 21 минг кишидан ошган, 170 бемор вафот этган.
Изоҳ (0)