Ўзбекистонда аҳоли ва тадбиркорларнинг валюта курси бўйича кутилмалари юқори даражада сақланиб қолмоқда. Натижада, Марказий банк раиси Мамаризо Нурмуротовнинг маълум қилишича, Республика валюта биржасида таклиф сезиларли камайган бўлса, валюта айирбошлаш шохобчаларида аҳоли томонидан валюта сотиб олинишинг ҳажми юқори суръатларда ошиши сақланиб қолди.
«Хусусан, аҳоли томонидан март ойида ўртача кунлик 13,3 миллион долларлик валюта сотиб олинган бўлса, апрель ойининг иккинчи ўн кунлигидан бошлаб бу сумма кескин ошди. 10 апрелда 19,5 миллион долларни ташкил этди, 13 апрель куни эса 22 миллион долларга етди», — дея маълум қилди Марказий банк раиси 15 апрель куни бўлиб ўтган брифингда.
Нурмуротовнинг таъкидлашича, шундай ҳолат юридик шахслар сегментида ҳам апрелнинг иккинчи декадасидан бошлаб кузатилмоқда — улар томонидан март ойида валюта биржасида ўртача кунлик 37,5 миллион долларлик валюта сотиб олинган бўлса, 10 апрелдан бошлаб ўртача кунлик талаб 30 фоизга ошган.
«Айни вақтда март ойида ўртача кунлик валюта сотиш бўйича таклифлар 21,5 миллион долларни ташкил этган бўлса, 10 апрелдан кейин валюта сотиш ҳажми қарийб 40 фоизга пасайди», — деди Мамаризо Нурмуротов.
Эслатиб ўтамиз, 14 апрелдан бошлаб Ўзбекистоннинг бир қатор банклари долларни 10 минг сўмдан юқори қийматда сотиш ва сотиб олишни бошлади. 15 апрель куни эса валюта биржасидаги савдолар чоғида доллар курси 10 121 сўмгача кўтарилди, Марказий банк эса 16 апрелдан долларнинг расмий курси айнан 10 121 сўм бўлишини эълон қилди.Қайд этиш жоиз, 14 март куни Ўзбекистон Марказий банки бошқаруви асосий ставка (аввалги қайта молиялаш ставкаси)ни 1 фоиз бандга пасайтириб, йиллик 15 фоиз даражасида белгилаш ҳақида қарор қабул қилган эди.
Изоҳ (0)