Қашқадарёда ғалати ишлар бўлмоқда. Қарши тумани ИИБ ходимлари фермерлар ортидан қувиб, бўш шартномага муҳр босиб, имзо қўйишга мажбурлаётган бўлса, ЙПХ инспекторлари кластерга тегишли автомобилларни ёппасига жарима майдонига олиб кетмоқда.
Қарши туманининг Чўлибўстон ҳудудида фаолият юритувчи фермерлар — Маҳмаюсуф Маҳмудов, Хурсанд Бекпўлатова, Баҳодир Ўтаевнинг хабар беришича, туман ИИБ ходимлари 14 апрель куни эрталаб соат 06:00 дан бошлаб фермерларни безовта қилишни бошлаган.
«Эрталаб 06:00 да телефон қилиб, мени чақирди. ‘Кластер тугатилди, печат босиб имзо қўйинг’ деб бўш шартнома берди. Имзо қўймайман дегандим, ‘Кластерни тугатиш бўйича, Президент қарори бор. Нега қарши чиқяпсан? Сен билан эртага алоҳида гаплашамиз’ деди», — дейди Баҳодир Ўтаев.
Бу ҳақда вилоят ИИБ ахборот хизмати раҳбари Ирода Расулова билан боғланиб, ҳолат бўйича изоҳ сўрадик. «Дарё» мухбири билан суҳбатлашган Ирода Расулова туман ИИБ раҳбарига бу ҳақда хабар берилганини, ИИБ ходимларининг ноқонуний хатти-ҳаракати тўхтатилганини айтди. Ирода Расулованинг таъкидлашича, ИИБ ходимларига бундай топшириқ берилганидан вилоят ИИБ бошлиғининг хабари бўлмаган.
Фермерлар Баҳодир Ўтаев, Хурсанд Бекпўлатова ҳам Ирода Расулованинг гапларини тасдиқлаб, ИИБ ходимлари ҳудудни тарк этганини маълум қилди.
Ғалати ишлар Қарши шаҳрида ҳам давом этмоқда. ЙПХ инспекторлари кластерга тегишли барча автомобилларни ёппасига жарима майдонига олиб кетмоқда. Бунга изоҳ сўраган ҳайдовчиларга эса «‘Sultontex’ бугундан тўхтатилади, буйруқ ҳам чиқиб қолади», дейишаётган экан.
Аниқланишича, вилоят ИИБ бошлиғи жорий йил 11 апрель куни вилоятдаги «Sulton tex group» хусусий корхонасига тегишли 27 та юк ва енгил автомобилларга вилоят ҳудуди бўйлаб ҳаракатланиш учун рухсат берган. Бу ҳақда махсус хат ёзилиб, барча блокпост масъулларига маълум қилинган. Шунга қарамасдан 14 апрель куни кластер корхонага тегишли 3 та автомобиль жарима майдонига олиб кетилган.
«Кўчага иш билан чиққан автомобилларимизни ёппасига жарима майдонига олиб кетишмоқда, — дейди кластер раҳбари Нурбек Эргашев. — Шу боисдан ҳам ҳайдовчилар ва ходимларимиз барча ишини тўхтатиб, кўчага чиқишмаяпти.»
Ҳолбуки, вилоят ИИБ бошлиғи имзолаган ва барча блокпост масъулларига юборилган хат 11 апрель куни чиққан. Демак, ЙПХ инспекторлари ва Қарши туман ИИБ ходимлари бошқарма бошлиғи топшириғига зид иш қилаётган бўлиб чиқадими?
Изоҳ (0)