Ўзбекистонда карантин қоидалари энг кўп бузилаётган вилоятлар рўйхати эълон қилинди

Ўзбекистонда тадбирлари эълон қилинган вақтдан бугунги кунга қадар карантин қоидаларига амал қилмаслик билан боғлиқ жами 63 882 та ҳолат аниқланди.  ИИВ матбуот хизматининг хабар беришича, карантин қоидалари ва санитария чекловларига риоя қилиш юзасидан тушунтириш ишлари олиб борилишига қарамасдан, ҳамон қоидабузарлик ҳолатлари кузатилмоқда.

Аввалроқ республика бўйлаб карантин қоидаларига амал қилмаслик билан боғлиқ  59 921 та ҳолат аниқлангани хабар берилган эди, ушбу қоидабузарликлар сони 1 кунда қарийб 4 000 га ошган. Энг кўп — 10 922 та қоидабузарлик Тошкент шаҳрида қайд этилган. Тошкент вилоятида эса бундай ҳолатлар сони 9 288 тани ташкил этмоқда.

Республика бўйича аниқланган қолган қоидабузарликлар эса қуйидагича:

• Фарғона вилоятида – 9 347 та;
• Самарқанд вилоятида – 5 961 та;
• Сирдарё вилоятида – 4 617 та;
• Қашқадарё вилоятида – 4 382 та;
• Наманган вилоятида – 3 654 та;
• Андижон вилоятида – 3 634 та;
• Бухоро вилоятида – 2 613 та;
• Қорақалпоғистон Республикасида – 2 354 та;
• Жиззах вилоятида – 2 184 та;
• Сурхондарё вилоятида – 2 122 та;
• Хоразм вилоятида – 2 117 та;
• Навоий вилоятида – 687 та ҳолатни ташкил этмоқда.

Санитария-эпидемиология назорати давлат инспекцияси бошлиғи Нурмат Отабеков «Карантин тадбирларига қанчалик риоя этсак, вазиятни шунчалик барқарор ушлаб қолишимиз мумкин. Акс ҳолда вазият мураккаблашиб, уни жиловлаш анча қийин кечишини ёдингизга солмоқчимиз», деб аҳолини яна бир бор карантин қоидаларига қатъий риоя этишга чақирганди.

ССВ вазири Алишер Шодмонов ҳам «Ҳаммамиз сабр қилишимиз керак. Қачонки интизом бўлса, барча тартиб-қоидага бўйсуниб, икки ҳафта уйимизда ўтирсак, ҳаммаси ўтиб кетади. Шунда биринчи навбатда оила аъзоларимизни сақлаб қолган бўламиз», — деб айтганди.