Коронавирус тарқалиши билан боғлиқ вазият баъзи мамлакатларда яхшилана бошлади, бироқ пандемия дунёда ўз чўққисига чиққани йўқ. Бу ҳақда Жаҳон соғлиқни сақлаш ташкилотининг расмий вакили Маргарит Харрис Женевада бўлиб ўтган брифингда маълум қилди, деб ёзмоқда Reuters.
Унинг сўзларига кўра, янги қайд этилаётган ҳолатларнинг 90 фоизи Европа мамлакатлари ва АҚШга тўғри келади. Бунда Европа мамлакатларида ҳолат бир хил эмас. Баъзи давлатларда касалланиш ҳолатларининг сони камаймоқда, Буюк Британия ва Туркияда эса аксинча, касалланиш ҳолатлари ошиб бормоқда.
Хитойдаги вазиятга изоҳ берган ЖССТ вакили мазкур мамлакатдаги янги ҳолатларнинг 90 фоизи хориждан кириб келганлигини таъкидлаган. Инфекция тарқалишининг дастлабки ўчоқларида вазият барқарор қолмоқда.
Шунингдек, ЖССТ вакили коронавирусга қарши вакцина яқин 12 ой ичида яратилишига шубҳа билдирган.
Аввалроқ Шанхайдаги пневмонияни даволаш бўйича экспертлар гуруҳи раҳбари Чжан Вэнхунь коронавирус устидан 2020 йилнинг охиригача ғалаба қозониб бўлмаслигини тахмин қилган эди. Унинг фикрича, 2020 йилнинг ноябрь ойида дунёда коронавируснинг иккинчи тўлқини кузатилади, бироқ унинг оқибатлари ҳозиргидек оғир бўлмайди. Хитойлик мутахассиснинг таъкидлашича, иккинчи тўлқиндан соғлиқни сақлаш тизими такомиллашмаган Африка ва Жанубий Америка давлатлари кўпроқ жабр кўради.
Жонс Хопкинс университети маълумотларига кўра, бутун дунёда коронавирусга чалинган беморлар сони 1,95 миллион кишига етди, 119,8 минг киши касаллик қурбонига айланган, 458,5 минг киши тузалган.Аввалроқ ЖССТ раҳбари коронавирус туфайли жорий этилган чекловларни олиб ташлаш бўйича тавсиялар берганди. Австрия, Италия ва Испания карантин чекловларини енгиллаштиришни бошлади.
Изоҳ (0)