Австрияда 14 апрелдан бошлаб коронавирус тарқалишининг олдини олиш мақсадида жорий этилган чекловларни секин-аста бекор қилиш бошланади. Бир ойлик карантиндан сўнг майдони 400 метр квадратгача бўлган, шунингдек, барча қурилиш ва боғдорчиликка оид дўконлар қайта иш бошлайди, деб хабар беради «РИА Новости».
Австрия коронавирус хавфига қарши тезкорлик билан ҳаракат қилиб, унинг кенг тарқалишига йўл қўймади. Мамлакатда COVID-19 билан касалланиш бўйича илк ҳолат 25 февраль куни қайд этилган бўлса, ўша вақтдаёқ канцлер Себастьян Курс ҳукумат вирус тарқалишининг олдини олиш бўйича барча чораларни кўришини маълум қилганди. Республикада фавқулодда штаб тузилиб, вирус билан боғлиқ кунлик вазият таҳлил қилиб борилди.
16 март куни Австрияда коронавирус билан касалланиш бўйича 959 та ҳолат қайд этилган эди. Шундан сўнг бир ҳафтага қаттиқ чоралар жорий этилди. Кейинроқ канцлер Курс чекловлар 13 апрелга қадар давом этишини, ҳукумат 14 апрелдан уни секин-аста камайтириб боришини маълум қилди. Бу вақтга келиб чоралар доираси кенгайтирилди: супермаркетларда ниқоб тақиш мажубурий қилиб қўйилди, кейинроқ ушбу чора жамоат транспортларига ҳам жорий этилди.
6 апрель куни ҳукумат Австрия жамиятини босқичма-босқич очиш бўйича режани тақдим этди. 14 апрелдан кичик дўконлар, 1 майдан эса қолган барча дўконлар, савдо марказлари ва сартарошхоналар ишга туширилади. Шунга қарамай, уларнинг иш фаолияти давомида гигиена қоидаларига қаттиқ риоя қилинади: ташриф буюрувчилар сони назорат остида бўлади, оралиқ масофа сақланади ва ҳар бир кишида ниқоб бўлиши керак.
Меҳмонхона ва ресторанлар май ойининг ўрталаридан кейин очилиши кутилмоқда, тадбирлар ўтказиш эса июнь охирига қадар тақиқда бўлади.
Австрия канцлерининг таъкидлашича, вазият ёмонлашса, ҳукумат бекор қилинган чекловларни қайта жорий этиши мумкин.
Изоҳ (0)