«Яндекс» Ўзбекистоннинг йирик шаҳарларида аҳолининг изоляцияланиш даражасини баҳолай бошлади. Бунинг учун компания таҳлилчилари 5 балли шкалага эга махсус индексни шакллантирди. Ушбу индекс «Яндекс» харитасининг бош саҳифасида кўринади.
Индексни ҳисоблашда Ўзбекистонда «Яндекс» дастуридан фойдаланиш статистикаси бўйича шахси кўрсатилмаган маълумотлардан фойдаланилади. Балл қанчалик юқори бўлса, шунчалик кўп одамлар изоляцияга амал қилаётганини билдиради. Бироқ таъкидланишича, ундан аниқ ҳисоб-китоблар учун эмас, балки вазиятни тахминий баҳолашда маълумот сифатида фойдаланиш мумкин.
«Яндекс» саҳифасида республиканинг йирик шаҳарлари тўғрисида маълумотни, шунингдек, Тошкент, Самарқанд, Бухоро ва Фарғона учун кунлик гистограммани кўриш мумкин. Шунингдек, шаҳарлар бўйича изоляцияланиш даражасини таққослаш мумкин. Бу ҳақдаги маълумотлар ҳар куни янгиланиб борилади.
«Яндекс» дастуридан фойдаланиш статистикасидан кўринишича, ўзбекистонликлар тахминан 16 мартдан бошлаб кўчаларга камроқ чиқишни бошлаган. Шу куни республикада карантин режими эълон қилинганди.
«Хитой, Италия ва Жанубий Кореядан олинган мисоллар ўз-ўзини изоляция қилиш коронавирус тарқалишини назорат қилишда жуда самарали эканлигини тасдиқлади. Биз, ‘Яндекс’ жамоаси, барчани уйда қолишга ва изоляция режимига риоя қилишга чақирамиз. Уйда бўлганда,сиз ўзингизни ҳам, бошқаларни ҳам ҳимоя қиласиз», — дейилади компания саҳифасида.Аввалроқ «Яндекс» харитаси Тошкентнинг бирор-бир кўчасида тирбандликлар кузатилмаётганини кўрсатганди.
Изоҳ (0)