O‘zbekistonda koronavirus tarqalishining oldini olish bo‘yicha bir qator profilaktik cheklovlar joriy etiladi

O‘zbekiston bosh davlat sanitariya vrachining 17-mart kuni “COVID-19 koronavirus infeksiyasining respublika hududida tarqalishini oldini olish, kasallikni to‘g‘ri tashxislash va davolash jarayonida profilaktik cheklov tadbirlarini joriy etish to‘g‘risida”gi 5-sonli qarori qabul qilindi, deya xabar berdi Sanitariya-epidemiologik osoyishtalik agentligi (SEOA) matbuot xizmati .

Ushbu qarorga muvofiq, 17-martdan boshlab quyidagi tartiblar joriy etiladi:

• barcha davolash-profilaktika muassasalarida COVID-19 koronavirus infeksiyasi bo‘yicha cheklov o‘rnatiladi;
• bemorlarni ko‘rgani kelgan va boshqa begona shaxslarni davolash-profilaktika muassasalariga kirishi, bemorlarni tashxis-davolash ishlariga bog‘liq bo‘lmagan shaxslar bilan to‘g‘ridan to‘g‘ri muloqot qilishlari taqiqlanadi;
• davolash-profilaktika muassasalariga kelayotgan bemorlarni tana haroratini o‘lchash, epidemiologik surishtiruv va koronavirus belgilariga tekshirib filtrdan o‘tkazish tashkil etiladi;
• davolash-profilaktika muassasalariga kirish va chiqishni qat’iy tartib asosida amalga oshirilishi va ichki ishlar boshqarmalarini jalb etgan holda muassasani perimetri bo‘ylab kun-u tun qo‘riqlanishi joriy etiladi;
• Sanitariya-epidemiologik osoyishtalik agentligi (SEOM) huzuridagi virusologiya laboratoriyasi COVID-19 koronavirus infeksiyasiga laboratoriya tahlillarini o‘tkazish milliy referens laboratoriyasi deb belgilanadi hamda Virusologiya ilmiy-tadqiqot instituti va hududiy SEOM virusologiya laboratoriyalarida o‘tkazilgan tahlillar musbat natija bergan hollarda milliy referens laboratoriyasida qayta tekshiruvdan o‘tkazilib, uning natijasiga asosan yakuniy tashxis qo‘yish amaliyoti joriy etiladi;
• bemor va uning oila a’zolari, bemor bilan muloqotda bo‘lganlarning shaxsiy ma’lumotlari sir saqlanishi bo‘yicha qat’iy nazorat o‘rnatiladi;
• epidemik vaziyat noxush bo‘lgan hududlardan kelgan shaxslar hamda ular bilan muloqotda bo‘lganlarni kasallikka laboratoriyada tekshirish uchun Sanitariya-epidemiologik osoyishtalik markazlarida kirish-chiqish tartibi bo‘lgan alohida maxsus namuna olish va kutish xonalari tashkil etiladi, bunda, tahlil natijasi chiqqunga qadar bemorlarni yuz niqobini taqqan holda kutib turishlari joriy etiladi.

Qarorning to‘liq matni bilan quyida havola orqali tanishish mumkin.

Eslatib o‘tamiz, O‘zbekistonda 15-mart kuni koronavirus yuqtirish bilan bog‘liq birinchi holat qayd etilgani sababli xorijiy mamlakatlar bilan barcha avia va avtoqatnovlar to‘xtatildi. Chet elda qolgan vatandoshlar charter reyslarida qaytarilishi ma’lum qilindi.

Avvalroq Tashqi ishlar vazirligi O‘zbekiston fuqarolariga vatanga qaytish uchun davlat chegarasidan o‘tish taqiqlanmaganini ma’lum qilgan edi. Hozircha O‘zbekistonda koronavirus yuqtirib olganlar soni 11 kishiga yetdi. Karantin sabab Toshkentdagi barcha talabalar turar joylari 19-martdan to‘liq yopilib, dezinfeksiya qilinadi.