Испания ҳукумати коронавирус сабабли мамлакатда жорий қилинган чекловларни енгиллаштирди. Ходимлари масофадан ишлай олмайдиган компаниялар 13 апрелдан ўз фаолиятини қайта бошлаши мумкин. Бу ҳақда BBC News хабар берди.
Икки ҳафталик тўхташдан кейин Испанияда қурилиш компаниялари, заводлар ва баъзи хизматларнинг ходимлари ишга қайтди. Бунда улар қатъий хавфсизлик чораларига амал қилиши керак. Қурувчилар аҳолидан узоқ бўлган ҳудудларда ишлай олади.
Испанияда чеклов чораларини енгиллаштириш ҳақидаги қарор касаба уюшмалари ва бир қатор мансабдорлар томонидан, хусусан, Каталонияда ҳам танқид остига олинди. Аҳолининг катта қисми ўз уйида карантинда қолади, жамоат жойлари, барлар ва кўплаб дўконлар камида 26 апрелгача ёпиқ бўлади.
Италияда кўплаб чеклов чоралари 3 майгача амалда бўлади, бироқ 14 апрелдан бошлаб компанияларнинг бир қисми ўз ишини қайта тиклаши мумкин. Шу кундан бошлаб баъзи компаниялар, шунингдек, китоблар, канцелярия маҳсулотлари ва болалар кийимларини сотадиган дўконлар очилади.
Жонс Ҳопкинс университети маълумотларига кўра, Испания коронавирусга чалинганлар сони бўйича дунёда АҚШдан кейин иккинчи ўринда турибди. Мамлакатда 169 минг киши инфекцияни юқтириб олган, уларнинг 17 мингдан ортиғи вафот этган. Сўнгги кунларда Испанияда суткалик ўлимлар сони камайди. Касаллик юқтириб олганларнинг 64 мингдан ортиғи тузалган.Италияда 156 мингдан ортиқ кишида касаллик қайд этилган. Мамлакатда 19,8 минг киши касалликдан вафот этган, Италия бу кўрсаткич бўйича дунёда АҚШдан кейин иккинчи ўринда турибди, 34 минг киши касалликдан соғайган.
Бутун дунёда коронавирусга чалинганлар сони 1,8 миллион кишидан ошди. Касалликдан 115 минг киши вафот этган бўлса, 438 мингдан ортиқ бемор тузалган.
Изоҳ (0)