Инсоният ёз фаслида коронавирус пандемиясидан буткул қутула олмайди, ноябрь ойида касалликнинг янги тўлқини юзага келиши мумкин. Бу ҳақда COVID-19’ни даволаш бўйича Шанхайдаги экспертлар гуруҳи аъзоси Чжан Вэнхуньга таяниб, «РИА Новости» хабар берди.
«Касаллик Жанубий Америка, Африка, Жануби-шарқий Осиё мамлакатида ҳам пайдо бўла бошлади, шу сабабли мавжуд математик моделга кўра, қиш келиши билан яна ҳамма уйида ўтиради, гуруҳ-гуруҳ бўлиб тўплана бошлайди», — дейди эксперт.
Чжан Вэнхунь пандемия вақтида тўплаган тажрибасига таяниб маълум қилишича, навбатдаги тўлқин диагностика соҳасида ҳозиргидек жиддий бўлмайди.
«Бироқ тиббиёт ресурслари бўйича етишмовчиликка эга давлатлар, жумладан, Африка ва Жанубий Америка мамлакатлари қишни ўтказиб олишда қийналади», — дейди эксперт.
Унинг сўзларига кўра, жаҳондаги эпидемиологик вазиятнинг назорати Хитой, АҚШ ёки Европага эмас, эпидемияга қарши курашиш учун энг кам имкониятга эга бўлган давлатларга боғлиқ.
Сўнгги маълумотларга кўра, Хитойда пандемия бошланганидан буён 83 135 кишида коронавирус аниқланган, жами 3343 киши вафот этган.
Аввалроқ Хитой ўз ҳудудида коронавирус тарқалишини тўхтатгани, мамлакатда автомобиль саноати яна оёққа туриб, ишлаб чиқаришни қайта йўлга қўйилгани ҳақида хабар берилганди. 8 апрель куни Хитой ҳукумати январь ойидан бери илк бор Ухандан чиқиш йўлларини очди.
Изоҳ (0)