13 апрель ҳолатига кўра Россиянинг 62 вилоятида коронавирус билан касалланиш бўйича яна 2558 та ҳолат қайд этилди. Бу ҳақда вирусга қарши кураш бўйича тезкор штаб маълумотларига таяниб, Meduza хабар берди.
Сўнгги маълумотларга кўра, мамлакатда коронавирус билан касалланганлар сони 18 328 кишига етган.
COVID-19 инфекцияси билан касалланиш бўйича аксарият ҳолатлар Москва шаҳри (бир суткада 1355 киши), Москва вилояти (495 киши) ҳамда Санкт-Петербург (121 киши) ҳисобига тўғри келмоқда.
Таъкидланишича, ўтган бир сутка ичида коронавирус қурбонлари сони 18 тага кўпайган. Эпидемия бошланганидан буён Россияда жами 148 киши коронавирус оқибатида вафот этди. Шунингдек, ўтган бир сутка ичида 179 кишга касалхонадан жавоб берилган. Шундай қилиб, мамлакатда даволанганлар сони 1470 кишига етди.
Маълумотларга кўра бутун Россия бўйлаб 1,3 миллиондан ортиқ одам коронавирусга тест топширган.
Аввалроқ Москва мери Сергей Собянин пойтахтда коронавирус инфекциясининг энг юқори чўққиси ҳали содир бўлмаганини маълум қилганди.
Эслатиб ўтамиз, Ўзбекистонда 13 апрель соат 10:00 ҳолатига кўра, коронавирус инфекциясини юқтириб олган фуқаролар сони 896 кишига етди. Мамлакатда коронавирус инфекциясига чалиниш билан боғлиқ дастлабки ҳолат қайд этилганидан бери 66 киши соғайди, тўрт киши (икки аёл ва икки эркак) эса коронавирус сабаб вафот этди.
Изоҳ (0)