Пандемия туфайли ишсиз қолган британиялик тўй сураткаши Крис Уоллес ўз «форма»сини йўқотмаслик йўлини топди. У Lego конструкторидаги фигуралардан тўй фотосессиясини уюштирди. Esquire’нинг ёзишича, Уоллеснинг янги иши ёш келин-куёвларнинг ҳавасини келтирадиган даражада чиройли чиққан.
Lego’дан ясалган келин-куёвнинг фигураларини у Amazon’дан буюртма қилган. Декорация ва фон сифатида ҳовлисидаги омборхона, ўз ити ва компьютери экранидаги суратлардан фойдаланган.
Уоллес жуфтликнинг танишув тарихини ҳам ёзди.
«Қандай ажойиб кун! Фред ва Флоренснинг омади чопди, карантинга қарамай, уларнинг тўйи бўлиб ўтди. Курерлар бу кун келиши учун қўлдан келган барча ишни қилди. Фред ва Флоренс омборда, аниқроғи Amazon’нинг конвеерида танишган. Уларнинг нигоҳи ўзаро тўқнашган ва шу лаҳзадан бошлаб улар умрбод бирга бўлишларини тушуниб етган эди», — деб ёзди сураткаш ўз сайтидаги фотосессия таърифида.
Уоллеснинг сўзларига кўра, Фред маросимга ўзининг Mercedes SL-500 автомобилида келган. У дўстлари билан тўй олдидан зиёфат ҳам уюштирган.
Тўйда махсус меҳмонлар — «Юлдузлар жанги» сагаси қаҳрамонлари Хан Соло ва Чубакка ҳам иштирок этган.
Тўй базми қандай якун топганини қуйидаги суратлар орқали томоша қилинг:
Изоҳ (0)