Америкалик Сара Дитмарс Кэхилл қариялар уйида яшовчи 94 ёшли онасини туғилган куни билан табриклашга келди, деб хабар берди CBS News.
Коронавирус карантини туфайли кекса аёл қизига яқинлаша олмади. Сара онасини узоқдан туриб табриклади. Аёл онаси учун қўшиқ куйлади ва рақсга тушди. Бироқ унинг ҳаракатлари кутилган натижани бермагандек эди, гўё.
https://www.facebook.com/1455512893/videos/pcb.10220048877279645/10220048872479525
Шунда Сара кўчанинг нариги томонида ниманидир хиргойи қилиб, ишлаётган эркакни кўриб қолди. Аёл унинг қўшиғини эшитиб, эркакнинг ўзига ёрдам бера олишини фаҳмлади.
«Мен унинг чиройли овозини кўчанинг нариги томонидан эшитдим У наушникда эди, мен қўлим билан унга имо қилдим. У наушникни ечиб, менга қаради. Унга чиройли қўшиқ куйлаётганини айтдим ҳамда онам учун куйлаб беришини илтимос қилдим. У таклифимдан хурсанд бўлиб кетди», — дейди Сара.
Альберт исмли эркак кекса аёлга «Happy birthday to you» (Туғилган кунингиз билан) ҳамда «His Eye Is On The Sparrow» («Унинг нигоҳи чумчуққа қаратилган») қўшиқларини шу даражада маҳорат билан куйлаб бердики, бу ҳолат Good News нашрининг эътиборини тортди.
Ушбу нашрда Альберт ҳақидаги мақолани Голливуд актёри Хью Жекман кўриб қолди. Ҳатто унинг қўшиғини ўз Instagram саҳифасига жойлаштирди.
https://www.instagram.com/p/B-pbZgmjr_v/
«Бу дунёда эзгуликлар нақадар кўплигини эслатувчи ўзига хос лаҳзалардан бири. Сиз билан яқиндан танишмоқчиман, сер. Агар кимда у ҳақда маълумот бўлса, илтимос ёзинглар. Мен унга шахсан раҳмат демоқчиман», — деб ёзади Хью Жекман.
Изоҳларда Сара Альберт ҳақида актёрга маълумот берди. Унинг сўзларига кўра, эртаси куниёқ Жекманнинг котибаси Альбертга қўнғироқ қилган ва актёрнинг у билан учрашмоқчи эканлигини айтган.
Ушбу воқеа нима билан тугаши ҳозирча номаълум. Альберт Хью Жекман билан учрашувни интизорлик билан кутяпти. У Саранинг онасининг ёнига яна бир марта борган ҳамда куйлаб берган.
Изоҳ (0)