Москва ҳайвонот боғи маъмурияти ҳайвонлар одамлар боғга келмай қўйганини пайқаган. Ходимлар ҳайвонларнинг саломатлиги жойида эканлиги, фақат улар одамларни соғинаётганини маълум қилган.
«Бизнинг ҳайвонларимиз ташрифчиларни соғинмоқда. Уларнинг аксарияти одамлар камлигини сезмоқда ва энди яқин атрофдан кимдир ўтса, уни катта қизиқиш билан кузатмоқда. Айниқса одамсимон маймунлар меҳмонларни кутмоқда — гориллалар ва маймунлар приматлар уйининг ташрифчилари билан мулоқот қилишни ёқтирарди», — дейилади ҳайвонот боғининг Instagram’даги расмий саҳифасида.
Шунингдек, катта пандаларда ҳам одамларга нисбатан қизиқиш ошган.
«Катта пандалар табиатда ёлғиз яшайди, бизда эса улар ўз волери ва таклиф қилинаётган ўйинчоқлардан қониқиш ҳосил қилмоқда. Бироқ ҳозир уларга нимадир етишмаётгандек туюлмоқда. Пандалар ўз ҳудуди яқинидан ўтаётган ҳар бир одамга фаоллик билан яқинлашмоқда», — деб ёзади боғ ходимлари.
Москва ҳайвонот боғи коронавирус хавфи туфайли Россия пойтахтидаги бошқа жамоат жойлари сингари 30 апрелгача ташрифчилар учун ёпилган.
Изоҳ (0)