АҚШ президенти Дональд Трамп мамлакатда коронавирус оқибатида вафот этадиганлар сони аввалроқ прогноз қилинган 100 минг қурбондан «сезиларли даражада кам» бўлишини маълум қилди, деб хабар беради Fox News.
Аввалроқ Оқ уй мутахассислари мамлакатда коронавирус қурбонлари сони 100-240 минг киши атрофида бўлишини тахмин қилганди.
«Ўйлашимча, қурбонлар сони ушбу рақамлардан сезиларли фарқ қилади. Шундайин оғриқли ва қайғули дамда биз бунинг аломатларини аниқ кўрмоқдамиз. Бу, асосан, инсонлар ҳаётини сақлаб қолиш борасидаги қаттиқ сиёсатимизга боғлиқ», — дейди Трамп брифинг вақтида.
Унинг айтишича, айрим штатлар, масалан, энг кўп касалланиш ҳолати қайд этилган Нью-Йоркда касалхонага мурожаат қилиш ҳолатлари камайган. Бундан ташқари, бутун мамлакат бўйлаб коронавирус билан янги касалланиш ҳолатлари камаймоқда ва бу мамлакат касалликнинг энг юқори чўққисига яқинлашаётганидан далолат беради. Трампнинг қўшимча қилишича, Детройт ва Янги Орлеан шаҳарларида вазият ҳозирда барқарорлашмоқда.
Аввалроқ АҚШда ўтган бир сутка ичида коронавирусдан 2 мингдан ортиқ бемор вафот этгани ҳақида хабар берилганди. Мамлакатда коронавирус билан касалланганлар сони 500 минг кишидан ошиб кетган, бу дунёдаги энг юқори кўрсаткич ҳисобланади.
Эслатиб ўтамиз, Дональд Трамп апрель ойининг бошида америкаликларни олдинда кутилаётган жуда оғир икки ҳафта ҳақида огоҳлантирганди.
Изоҳ (0)