Туркиянинг 30 та шаҳри ва Зонгулдак вилоятининг барча ҳудудида коронавирус тарқалишига қарши кураш чораси сифатида комендантлик соати жорий этилди. Бу ҳақда мамлакат ички ишлар вазирлигига таяниб, Аnadolu агентлиги хабар берди.
Таъкидланишича, ушбу чора 11 апрель ярим тундан кучга киради ва 13 апрель соат 00:00 га қадар давом этади. Ушбу 48 соат давомида комендантлик соати жорий этилган ҳудудлар аҳолиси ўз уйларини тарк эта олмайди.
Маълумотларга кўра, комендантлик соати пойтахт Анқарага, шунингдек, мамлакатнинг энг йирик шаҳарларидан бири — Истанбулга ҳам тегишли.
Жонс Ҳопкинс университети маълумотларига кўра, Туркияда коронавирус билан касалланганлар сони 47 минг кишидан ошган, 1006 киши вафот этган.
Эслатиб ўтамиз, 4 апрелдан бошлаб Туркиянинг йирик шаҳарларига автотранспортлар кириши ҳамда чиқиши тақиқланди, 20 ёшдан кичик бўлганлар учун комендантлик соати эълон қилинган эди. Мамлакат ҳукумати фуқароларнинг жамоат жойларида ниқобда юришини мажбурий қилиб қўйди.
Изоҳ (0)