Жанубий Корея ҳукумати коронавирусдан даволанишга муваффақ бўлган 91 кишининг тести уларнинг организмида яна вирус борлигини кўрсатганини маълум қилди. Бу ҳақда мамлакат касалликлар назорати ва профилактикаси маркази директори Чон Ин Кёнга таяниб, Reuters хабар берди.
Таъкидланишича, бу каби ҳолатлар кўпайиб бормоқда. Жорий ҳафтанинг бошида бундай беморлар сони 50 кишини ташкил этган эди. Чон Ин Кённинг сўзларига кўра, ушбу инсонлар қайтадан касалликни юқтириб олмаган, балки вирус қайта фаоллашган.
Айни вақтга келиб Жанубий Кореяда COVID-19 билан касалланганлар 10 450 тани ташкил этмоқда, 208 киши вафот этган.
Аввалроқ Жанубий Кореяда касалланиш ҳолатлари камаяётгани ҳақида хабар берилган эди. 10 апрель куни мамлакатда 27 кишида коронавирус аниқланган.
Сўнгги маълумотларга кўра, бутун дунё бўйлаб янги турдаги COVID-19 коронавирус инфекцияси билан касалланганлар сони қарийб 1,7 миллион кишига яқинлашган, вирус оқибатида вафот этганлар сони 100 минг кишидан ошган.
Изоҳ (0)