Бош санитария инспектори Нурмат Отабеков АОКА штабида бўлиб ўтган навбатдаги брифингда ижтимоий тармоқда Юқори Чирчиқ туманидаги махсус шифохонада шароитлар талаб даражасида эмаслиги борасида тарқалган фикрлар юзасидан муносабат билдирди.
«Бу объект ўта қисқа муддатларда барпо этилди. У ерда вақтинча бўлиб турган фуқароларга барча шарт-шароитлар яратиб беришга ҳаракат қилинди. Албатта, бирданига идеал шарт-шароит қилинмаган бўлиши мумкин. У ердаги одамларни кам сонли қилиб алоҳидалаш, яшаш ва овқатланиш шароитларини қилиб бериш осонликча амалга оширилмаяпти», — деди Нурмат Отабеков.
Отабековнинг таъкидлашича, беморлар яшаётган вагонларда ҳожатхона, кондиционер, Uzmobile телефонлари ўрнатилган. Овқатланишлари учун бир маротабалик идишлар ташкил қилинган. Ишлатиб бўлинган идишлар ва овқат қолдиқлари махсус крематорийларда ёқиб ташланмоқда.
«Шаҳар ҳокими ҳар куни ўша жойга бориб қаерда қандай камчилик бўладиган бўлса, уларни бартараф қилиш учун ҳаракат қиляпти. Бу ўткинчи муддат. Жуда кўп нарса талаб қилишимиз ҳам мантиқан тўғри эмас», — дейди у.
Аввалроқ Нурмат Отабеков аҳолини яна бир бор карантин қоидаларига қатъий риоя этишга чақиргани хабар берилган эди.
Изоҳ (0)